Jıyn ótip jatqan emhananyń pasıenti týra Densaýlyq saqtaý mınıstriniń kózinshe shý shyǵardy. 70 jastaǵy zeınetkerdi dárigerler qabyldamaı ábden sandaltqan eken. Ashynǵan keıýana emhanany aralap júrgen Eljan Birtanovqa shaǵymdanyp, astanalyq aq halattylardyń bar bylyǵyn jaıyp saldy, dep habarlaıdy qamshy.kz KTK arnasyna silteme jasap. 

Ómirzaq Taıjanova, Astana qalasynyń turǵyny: 

– Medbıke durys jumys istemeıdi.Hırýrgqa kirý úshin mınıstrlike qońyraý shaldym.Sosyn olar meni hırýrgke jazdy. Bul ne masqara? Ońbaǵandar!

Iaǵnı Ómirzaq ájeı qalalyq Densaýlyq saqtaý basqarmasyna shaǵymdanyp júrip, hırýrgtyń qabyldaýyna áreń jazylypty.Júrip-turýy qıyn zeınetker tegin beriletin dárisin de ala almaı júr eken. Mınıstrdiń kózinshe bar kemshilikti jaıyp salǵan ájeıdi emhanadaǵy aq halattylar kabınetke dereý ertip áketip, ashýyn áreń basty. Al tekserýge kelgen mınıstrdiń aldynda tek jetistikterin tizip júrgen emhananyń bas dárigeri sózden tosylyp qalǵanymen, qobaljýyn bildirmeýge tyrysty.

Altynshash Tabyldına, №5 emhananyń bas dárigeri:

 – Naýqastyń aıtyp turǵany ras. Hırýrgqa ýchaskelik dáriger kezekke qoıady. Bul kóp adamnyń kóńilinen shyqpaıdy. Qazir emhanada telefonǵa 4 operator jaýap berip otyr. Eger olar jaýap bermese, kútý kerek.