Balasynyń denesindegi kógergen izderdi ańǵarǵan Gúlzıra Alpattına budan soń polısıaǵa aryzdanyp, arnaıy saraptama jasatqan.

Pavlodarda kók ala qoıdaı bolyp úıine oralǵan búldirshin endi № 16 balabaqshaǵa barýdan bas tartyp otyr, dep habarlaıdy pavlodarnews.kz.

Búldirshinniń anasy 42 jastaǵy Gúlzıra Alpattına qańtar aıynyń sońynda bolǵan oqıǵadan endi ǵana esin jıǵanyn aıtady. Degenmen balabaqshadaǵy janjaldan uly Mıras pen qyzy Áıgerim shoshyp qalǵan.

- Qyzym beste, ulym tórt jasta. Sondyqtan ekeýi bir topqa barady. 24-qańtar kúni ulym topta tekshe pishindi oıynshyqpen oınap júrip, ony abaısyzda Aısultan degen balanyń basyna tıgizip alǵan. Nátıjesinde balanyń basy kishkene qyzaryp qalǵand soń, tárbıeshi anasyna habarlaǵan. Aısultannyń anasy birden balabaqshaǵa jetip, balamdy sabaǵan. Oǵan ulymnyń denesindegi myna izder dálel. Sondaı-aq, muny sol kezde topta bolǵan qyzym da rastap otyr, - deıdi Gúlzıra Alpattına.

Balasynyń denesindegi kógergen izderdi ańǵarǵan Gúlzıra Alpattına budan soń polısıaǵa aryzdanyp, arnaıy saraptama jasatqan. Nátıjesinde QR QK-niń 108-baby «Densaýlyqqa qasaqana jeńil zıan keltirý» boıynsha is qozǵalǵan.

- Balamnyń basyna aǵashtan jasalǵan tekshe oıynshyqty laqtyrǵan. Men kelgende balabaqshadaǵy medbıkeden shyqqan eken. Mańdaıy qatty soǵylypty. Balam jylap otyrdy. Oǵan oıynshyq laqtyrǵan er bala topqa jańadan aýysqanyn estip bildim. Tárbıeshige eskertý jasaǵanym bolmasa, eshkimge de tıiskenim joq, - deıdi Janna Baımýldınova.

Onyń sózin topta bolǵan tárbıeshi Merýert Tóleýbekova da rastap otyr.

- Mıras pen Áıgerim bir úıdiń balalary, biraq eki túrli. Mıras júgirip sekirip oınaǵandy unatady. Topta eki kún ǵana bolsa da, biraz ábigerge saldy. Esikti teýip, aıaǵyn soǵyp aldy. Biraq oıynshyqty qasaqana laqtyrǵan joq. Dese de, Aısultannyń basyna tıip ketti. Eshkim-eshkimdi urǵan joq. Ata-analarǵa bárin túsindirgen edik. Alaıda oqıǵanyń arty urysqa aınalyp, másele ýshyǵyp ketti, - deıdi tárbıeshi.

№ 16 balabaqshanyń dırektory Anar Tólebekova bul oqıǵa eki aptalyq oqýǵa ketken kezinde oryn alǵanyn aıtady. Buǵan deıin bir úıdiń ul-qyzy «Eresek B» tobynan «Eresek A» tobyna aýystyrylǵan. Aıta keterligi, balasynyń sabalǵanyna ashýly ata-ana isti sońyna deıin jetkizbeı qoımaıtynyn aıtyp, moraldyq shyǵyn óndirip alýǵa bekinip otyr. Bul iske qatysty sot otyrysy naýryz aıynyń 31-i kúni № 2 qalalyq sotynda ótedi dep kútilýde. Al, basyna oıynshyq tıip ketken Aısultan esimdi balǵyn balabaqshaǵa baryp júr.

Aıgerim Jankashova

Sýretterdi usynǵan - Gúlzıra Alpattına