Qazaqstannyń mádenı murasyn dáripteý jáne Qazaqstan men Reseıdiń mádenı-gýmanıtarlyq yntymaqtastyǵyn nyǵaıtý maqsatynda, Máskeýdegi Memlekettik Tretákov galereıasynda 1966 jyly «Qazaqfılm» kınostýdıasynda túsirilgen, rejıser Sháken Aımanovtyń «Atameken» kórkem fılmi kórsetiledi dep habarlaıdy Qamshy aqparattyq agenttigi "Qazaqfılmniń" baspasóz qyzmetine silteme jasaı otyryp.
Keńes dáýiriniń úzdik fılmderiniń biri «Ottepel: lısom k býdýshemý» fılmi murajaı aralyq festıvaldiń «Voına okonchena» baǵdarlamasynyń sheńberinde kórsetiledi. Festıvál uıymdastyrýshylary: A.S. Pýshkın atyndaǵy beıneleý óneriniń Memlekettik murajaıy (GMII), Memlekettik Tretákov galereıasy (GTG), Máskeý murajaıy jáne Gorkıı parki.
«Atameken» fılminiń kórsetilimi 2017 jyldyń 26 sáýirinde saǵat 19:00-de Tretákov galereıasynyń Injener korpýsynda bolady (Lavrýshınskıı, 12).
«Atameken» fılminiń oqıǵa jelisi ekinshi dúnıejúzilik soǵysynan bir jyl ótkennen keıingi ýaqytty baıandaıdy. Fılmniń basty keıipkerleri – ata men nemere – soǵysta qaıtys bolǵan balasynyń súıegin taýyp, týǵan jerine alyp kelý úshin poıyzben Reseıge attanady. Senarıdi Oljas Súleımenov jazǵan.
Sháken Aımanovtyń esteliginen: «Bizdiń fılm kórermenge oı salý úshin, ózin damyta alýy maqsatynda túsirilgen. Keıipkerler týǵan jerinen ótip, adamdarmen tanysyp, soǵystyń kesirinen qıraǵan orys jerin kórsetý mańyzdy emes. Biz úshin, qarıanyń fılmniń sońynda álemge, adamdarǵa degen kózqarasynyń ózgergenin kórsetý mańyzdy boldy.» («Sháken Aımanov. O sebe, o svoem ıskýsstve», Máskeý, 1974 g.)
«Atameken» fılmi Kúlásh Baıseıitova atyndaǵy Qazaq QSR-nyń Memlekettik syılyǵymen marapattaldy (1968 j.). Fılmdegi basty róldi somdaǵan Elýbaı Ómirzaqov ta Memlekettik syılyqty ıemdendi. Sondaı-aq, fılmge Mýrat Ahmadıev, Iýrıı Pomeransev, Ámına Ómirzaqova, Sholpan Altaıbaeva jáne taǵy basqalar túsken.
«Voına okonchena» baǵdarlamasynyń sheńberinde keńes jáne batys Eýropanyń fılmderi kórsetiledi, olardyń arasynda: «Germanıa, god nýlevoı» Roberto Rossellını (Italıa, 1947), «Kres za otvagý» Kazımeja Kýsa (Polsha, 1959), Aleksandr Alov pen Vladımır Naýmov «Mır vhodáshemý» (SSSR / RSFSR, 1961), «Nıkto ne hotel ýmırat» Vıtaýtas Jalakávıchýs (SSSR / Lıtva, 1965), «Holodnye dnı» Andrash Kovach (Vengrıa, 1966), «Dva Fedora» Marlen Hýsıev (SSSR/Ýkraına, 1985 g.), «Bezýmıe» Kaló Kıısk (SSSR / Estonıa, 1968) jáne taǵy basqalar.
Sonymen qatar, «jylymyq» kezeńiniń mádenıetine, sáýletine, ónerine jáne soǵyssyz álemge arnalǵan derekti fılmderdiń kórsetilimi ótkiziledi. Festıváldiń sheńberinde Máskeýdiń ár túrli mádenı alańdarynda leksıalar, dóńgelek ústelder, sýret jáne fotografıa kórmeleri, jáne de konsertter men poezıa oqýlary ótedi.