QR Mádenıet jáne sport mınıstri Arystanbek Muhamedıuly «Vremá» gazetiniń tilshisine bergen suhbatynda Dımash Qudaıbergenge memleket tarapynan qashan da qoldaý kórsetilip júretinin aıtty. Búgingi tańda halyq arasynda «Mádenıet mınıstrligi Dımash asa tanymaldylyqqa ıe bolǵan soń ǵana jetistigine ortaqtasyp júr» degen qaýesetke qatysty pikirimen bólisti. Sondaı-aq, áńgime barysynda EKSPO-2017 kórmesi aıasynda ótetin is-sharalar jóninde oıyn aıtty. Máselen, Rıannanyń ýáde etilgen konserti ótpeıtin bolypty. Munyń sebebin suraǵanda, Muhamedıuly irkilmesten Dımashty Rıannadan artyq qoıatynyn aıtty.
«EKSPO-2017 úshin mınıstrlik daıyndaǵan mádenı baǵdarlamǵa shetel ánshileriniń qatysy joq. Bizdiń mindetimiz – Qazaqstannyń kópultty óneriniń jetistikterin, eń jaqsy teatrlary men murajaılaryn kórsetý. Máselen, men Dımash Qudaıbergendi konsertke qýana-qýana shaqyra alamyn. 27 maýsymda «Astana Arena» onyń arqasynda tolyp otyratynyna senimdimin. Men Rıanna men Madonnadan góri Dımash Qudaıbergenniń konsertin kútemin».
Sonymen qosa, Dımash Qytaıǵa baryp, talanty el asyp kelgen soń ǵana mınıstrlik ony qoldaı bastady degenderdi synap, osy ýaqytqa deıin qazaqtyń talant ıesin qashan da bıikke kóterip júrgenderin aıtty.
«Men Dımashty alǵash 2012 jyly «Jas qanat» baıqaýynda kórgenmin, sodan beri onymen aralasyp kelemin. Osy ýaqytqa deıin Dımash halyqaralyq, memlekettik is-sharalarǵa qatysyp keldi, onyń repertýaryn, deńgeıin jaqsy bilemiz. Ol – Qazaq ulttyq óner ýnıversıtetiniń stýdenti. Sóıtip, biz memleket atynan Dımashty «Slaván bazaryna» jiberdik, ol jeńispen oraldy. Qytaıdyń Hunan telearnasynda ótken baıqaýǵa Mádenıet mınıstrliginiń qarjysy esebinen bardy. Joba barysynda Dımash qazaq ánin shyrqaıtyn kezde biz óner akademıasynyń fólklorlyq-mýzykalyq tobyn jiberdik, sondaı-aq, Dımash pen onyń Otany Qazaqstan týraly fılm túsirgen Hunan TV arnasy túsirilim tobynyń Astanaǵa kelýine járdemdestik. Dımashtyń 2016 jyldyń qyrkúıeginen beri «Qazaqkonserttiń» shtattaǵy qyzmetkeri ekenin ekiniń biri bile bermeıdi. Bul da memlekettiń qoldaýy. Dımash Qudaıbergen – barsha halqymyzdyń maqtanyshy, sózsiz talant ıesi. Biz jas talanttyń ashylýyna kómektesip jatyrmyz, ol bizdiń mindetimiz. Jáne Dımashty jarqyn bolashaq kútip turǵanyna senimdimin».