Jaıly ómir úshin adamǵa ne kerek? Qomaqty qarjy ma? Úlken páter men úı me? Múmkin keń asqana men ádemi kıim shyǵar?

Tehas ýnıversıtetiniń profesory Djeff Ýılson úshin munyń barlyǵy mańyzdy emes. Profesor qoldaǵy bardan bas tartyp ta jaqsy ómir súrýge bolady dep esepteıdi. Ol óz oıyn tájirıbe júzinde dáleldeýge tyrysty.

Birneshe jyl buryn Ýılson úlken úıde turǵan. Ajyrasqannan keıin jaldamaly páterge kóshedi. Ol burynǵy úıinen bes ese kishkentaı. Sol kezde-aq ol qoqys salatyn konteınerge kóshýdi oılap júrgen.

Úıdiń páter aqysyn tóleıtin ýaqyt jetkende Ýılson zattaryn satyp, tek bir shamadan kıimdi ǵana qaldyrǵan. Jeti aı boıy ol kabınetinde túnep júrgen.

2014 jyly Djeff qoqys salatyn konteınerge  kóshti. Onda eshqandaı jaǵdaı jasalmaǵan. Alǵashqy alty aıda ol qoraptardyń ústinde uıyqtady. Eń aldymen bólmesine jeldetkish ornatty. Sebebi kúndiz konteıner 55 gradýsqa deıin qyzatyn. Kelesi kezekte qabyrǵalardy boıaý, eden jasaý boldy. Ýaqyt óte kele konteınerdiń sáni kire bastady.

Djeff matras pen jastyqtardan tósek jasady. Qazir konteınerdiń qoqys salatyn jáshik ekenine sený qıyn. Qazir onda ómirge qajettiniń barlyǵy bar. Iaǵnı káriz júıesi, elektr toǵy, tamaq daıyndaýǵa arnalǵan pesh jáne t.b.  

Tehas ýnıversıtetiniń profesory adamdarǵa qoqys salatyn konteınerlerge kóshýge shaqyrmaıdy. Djefftiń aıtpaǵy kóp oryndy almaı-aq, sý men toqty únemdep, qaldyqtardy az qaldyrýǵa bolatynyn kórsetý jáne eń bastysy  jaqsy ómir úshin jaǵdaıdy adamnyń ózi jasaı alatynyn aıtady.