Úkimet basshysy Baqytjan Saǵyntaevtyń pikirinshe, bebı-boksty paıdalaný tastandy balalar máselesin sheshpeı, kerisinshe olardyń sanynyń artýyna jáne otbasylyq qundylyqtardy eskere otyra, qoǵamda teris pikirdiń týyndaýyna ákelýi múmkin, dep habarlaıdy Qamshy aqparattyq agenttigi Sputniknews.kz portalyna silteme jasap.

Májilis depýtaty Baqytgúl Hamenova tastandy sábıler máselesine alańdaýshylyq tanytyp, Úkimet basshysy Baqytjan Saǵyntaevqa depýtattyq saýal joldaǵan bolatyn. Ol tyǵyryqtan shyǵar bir jol retinde buǵan deıin de depýtattar usynǵan «bebı-boks» dep atalatyn úmit besikterin ornatýdy taǵy kótergen edi.

«Bebı-boks dep atalatyn úmit besikteri búginde biraz elde bar. Batystaǵy kóptegen el aýrýhana janyna qoıylatyn jáshikterdiń arqasynda myńdaǵan náresteniń ómirin aman saqtap qaldy. Qara sýyq pen ıt-qustyń jemtigine aınalǵansha, ózge elderde keńinen taraǵan tastandy nárestelerge arnalǵan úmit besikterin ornatý tyǵyryqtan shyǵar amal ma dersiń?», — degen edi depýtat májilis otyrystarynyń birinde.

Baqytjan Saǵyntaev depýtattyń saýalyn bir aı qarastyryp jaýap bergen. Premer-mınıstrdiń jaýabynda jazylǵandaı, «Baby box» ornatýǵa qatysty álemdik tájirıbe kóńil kónshitpeıdi. Sońǵy on jylda Eýropalyq Odaqtyń 11 elinde 200-ge jýyq bebı-bokstyń ornatylýy tastandy balalar sanynyń azaıýyna ákelgen joq. Shvesıa, Vengrıa, Germanıa, Avstrıa sıaqty elder tastandy balalarǵa arnalǵan bebı-bokstardy paıdalanýdyń tıimsizdigine baılanysty mundaı tárjirbıeden bas tartqan.

«IýNISEF, BUU-nyń Balalardyń quqyqtaryn qorǵaý komıteti, adam quqyǵy boıynsha Joǵarǵy Komısar Ofısi de ár balanyń óz ata-anasyn bilý quqyǵyn bekitetin Bala quqyqtary týraly konvensıanyń normalaryna qaıshy keletindikten, bebı-bokstardy ornatýdan bas tartýdy usynǵan bolatyn. Bebı-bokstardy ornatý 2011 jylǵy 26 jeltoqsandaǵy «Neke (erli- zaıyptylyq) jáne otbasy týraly» kodekstiń 47,70- baptarynyń, sondaı-aq 2014 jylǵy 3 shildedegi QR Qylmystyq kodeksiniń 119, 140, 141-baptarynyń talaptaryn buzady», — dep jazylǵan jaýapta.

«Bastysy, bebı-bokstardy paıdalaný kóshede qaldyryp ketken nárestelerdiń shetinep ketý problemalaryn sheshpeı, tastandy balalar sanynyń artýyna jáne otbasylyq qundylyqtardy eskere otyra, qoǵamda teris pikirdiń oryn alýyna ákelýi múmkin», — deıdi Saǵyntaev.

Qazirgi ýaqytta baladan bas tartýdyń aldyn alý sıaqty áleýmettik mańyzdy máseleni sheshý úshin «Ana úıi» qoǵamdyq qory barlyq óńirde 25 daǵdarys ortalyǵynyń bazasynda ómirdiń qıyn jaǵdaıyna tap bolǵan áıelder úshin arnaıy jobasyn iske asyrýda.

Statısıka boıynsha aı saıyn daǵdarys ortalyǵyna jańa týǵan nárestemen 45-ke jýyq ana túsedi eken.

«Ana úıi» jobasynyń oń tájirıbesin eskere otyryp, memlekettik organdar memlekettik emes uıymdarmen birlesip, nárestelerdiń ómirin saqtap qalý, otbasylyq qundylyqtardy nyǵaıtý boıynsha júrgizip jatqan basqa da keshendi sharalarymen birge jalǵasatyn bolady. Osy maqsatta Úkimet ýákiletti memlekettik organdarǵa kórsetilgen problemalardy sheshýge baǵyttalǵan qosymsha sharalar qabyldaý tapsyrmasyn berdi», — dep jazylǵan jaýap hatta.

Kámeletke tolmaǵandar arasyndaǵy júktilik sany sońǵy eki jylda 4702-den 4090-ǵa, kámeletke tolmaǵandar arasyndaǵy túsik tastaý 700-den 564-ǵa deıin tómendegen, erte dıspanserlik baqylaýmen qamtylǵan júktiler sany 78,1%-dan 81,6%-ǵa deıin artqan.