Sırıaǵa kóship ketip, eki jyl DAISH quramynda bolǵan brıtandyq arý óz eline oralyp, sot úkimin kútýde. Qyzynyń oqıǵasy jaıynda sotqa tolyq aqparatty ákesi aıtyp bergen, dep habarlaıdy Qamshy aqparattyq agenttigi sheteldik life.ru basylymyna silteme jasap.
Islam dinin qabyldaǵan 22 jastaǵy Kolsoma Begým men onyń 23 jastaǵy kúıeýi Stefan Arıstıdý tutqyndalyp, ótken aptada Túrkıa bıligine qaıtarylǵan bolatyn. Brıtandyq otbasylyq jup 2015 jyly DAISH quramyna kirgen. Keıinnen Sırıa shekarasyna jaqyn ornalasqan Túrkıanyń Kılıs qalasynda ekstremıstik sıpattaǵy qylmys jasady degen aıyppen tutqynǵa alynǵan bolatyn.
Soǵys júrip jatqan elde Kolsoma bir bala bosanǵan, keıinnen ony Ulybrıtanıaǵa qaıtarýǵa talpynǵan. Otbasylyq juptyń aıtýynsha, olar DAISH-tyń quramyna sharıǵat zańydary boıynsha ómir súrý maqsatynda qosylǵan, alaıda onyń ekstremıstik baǵyttaǵy uıym ekendigin bilgennen soń dereý bas saýǵalaýǵa tyrysqan. Al óziniń týǵan jerlerine kelý úshin, olar eń aldymen sottyń aldynda jaýap berýleri tıis.
«Olar jastyqpen istegen qatelikteriniń jazasyn óteýi qajet. Degenmen kez kelgen adam ekinshi múmkindik alýǵa laıyqty dep oılaımyn», - dep málimdedi Kolsomanyń ákesi Ahmed Álı.
Ákesi qyzynyń Stefanǵa turmysqa shyǵyp, Sırıaǵa ketý jaıly pikirin qup kórmeı, kinálaǵan. 2015 jyly turmys qurǵan ýaqytta qyz akýsher mamandyǵynda oqyp júrgen bolatyn. Al qazir Ahmed Álı qyzynyń óz qateligin túsingendigin, DAISH-tyń qandaı uıym ekendigin bilgennen soń týǵan jerine oralýǵa sheshim qabyldaǵandyǵyn aıtyp, qorǵaý ústinde.
Kolsoma ákesiniń sózine qarsy shyǵyp, basqa memleketke qashyp ketip, sol jerde turmysqa shyqqan. Bir kúnde joǵalyp ketken qyzynyń elden ketip qalǵandyǵyn ákesi bastapqyda bilmegen de. London qalasyndaǵy páterlerine polısıa qyzmetkerleri basa-kóktep kirip, ákesine mán-jaıdy túsindirgen eken.
«Meniń qyzymdy Sırıaǵa ketip qaldy degen sózderine basynda sene almadym», - deıdi Ahmed Álı.
Otbasylyq juptyń aıtýynsha, olar Sırıada abaqtyda turǵan sekildi ómir súrgen jáne de sotta jaýap berýge daıyn ekendikterin, tek Anglıada turýǵa ruqsat bergenderin qalap otyr. Derekterge sáıkes, Arıstıdýdyń qandaı da bir terorızmge qatysy bar ekendigi anyqtalsa, oǵan 15 jylǵa bas bostandyǵynan aıyrylý qaýipi tónip tur.
Aýdarǵan: Nazerke Labıhan
