Ózbekstan Prezıdentiniń Qazaqstanǵa jumys sapary aıasynda Nursultan Nazarbaev Shavkat Mırzıóevpen kezdesti dep habarlaıdy Qamshy aqparattyq agenttigi akorda.kz-ke silteme jasaı otyryp. Kezdesýde ózbek kóshbasshysynyń Qazaqstanǵa bıylǵy naýryz aıyndaǵy memlekettik sapary barysynda eki el arasynda qol jetkizilgen ýaǵdalastyqtardyń iske asyrylý máseleleri talqylandy.

Memleket basshysy ótken kezdesýden beri eki el arasyndaǵy iskerlik belsendilik artyp otyrǵany baıqalatynyn atap ótti.

– Bıylǵy birinshi toqsanda ekonomıkanyń túrli salasyndaǵy iskerlik ózara qarym-qatynastyń deńgeıi artty. Osy oraıda, kólik-logıstıka salasyn, avtoónerkásipti, sondaı-aq keń aýqymdy máselelerge qatysty óńirlik yntymaqtastyqty atap ótýge bolady. 2017 jylǵy alǵashqy úsh aıda taýar aınalymy 37%-ǵa ósti, – dedi Qazaqstan Prezıdenti.

Sh.Mırzıóev tyǵyz ekijaqty kezdesýler memleketaralyq qarym-qatynastyń tıimdiligine tikeleı yqpal etip otyrǵanyna nazar aýdardy.

– Bıylǵy naýryz aıyndaǵy sapardan soń biz birlesken jumystardyń barlyq baǵyty boıynsha jol kartasyn qabyldadyq. Mınıstrler, óńirler basshylary deńgeıindegi kezdesýler jıiledi, – dedi ózbek kóshbasshysy.

Ózbekstan Prezıdenti Reseı Federasıasynan munaı tasymaldaý máselesine baılanysty qoldaý kórsetkeni úshin Nursultan Nazarbaevqa alǵys aıtty.

Sońynda eki el basshylary Qazaqstan men Ózbekstan arasyndaǵy yntymaqtastyqtyń oń qarqyny saqtalyp, odan ári damı beretinine senim bildirdi.