QR Bilim jáne ǵylym mınıstri Erlan Saǵadıevtiń aıtýynsha, Memleket basshysynyń «Bolashaqqa baǵdar: rýxanı jańǵyrý» maqalasynda kórsetilgen maqsat-mindetter aıasynda jańa oqý jylynan bastap birqatar pánder mýzeılerde ótkiziledi, dep xabarlaıdy Qamshy aqparattyq agenttigi QazAqparatqa silteme jasap.

«Geografıa, dúnıetaný jáne Qazaqstan tarıxy sabaqtaryn keminde eki saǵattan mýzeılerde, joǵary oqý oryndarynyń mýzeıleri men ǵylymı ınstıtýttarynda ótkizýdi josparlap otyrmyz. Árıne, bul is-sharalar tek qana jaǵdaıy bar jerlerde ótkizeledi. Degenmen, Qazaqstannyń mýzeıleri kúzge deıin daıyn bolýy kerek. Sonyń ishinde oqýshylar otyratyn oryndardy daıyndap, mýzeılerdi qajetti texnıkalyq quraldar - proektorlar men ınteraktıvti taqtalarmen qamtasyz etý kerek. Joǵary oqý oryndaryna qarasty zertteý ınstıtýttarynyń mýzeılerin ózimiz daıyndaımyz. Birqatar oblys ákimderimen osy másele talqylandy. Bul jumysty ótkizý úshin jergilikti ákimdermen mýzeılerge barý aqysyn tóleý mexanızmi ázirlenýi tıis», - dedi Saǵadıev búgingi Úkimet otyrysy barysynda.

Mınıstrdiń aıtýynsha, búginnen bastap mádenıet jáne sport mınıstrligimen tıisti keńester ótkiziletin bolady. Sol kezde jańa oqý jylynan bastap mektep oqýshylary úshin mýzeılerde sabaq ótkizý máselesi jan-jaqty pysyqtalady.