Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilázov pen onyń sybaılastaryna qatysty qylmystyq isti qaraý odan ári jalǵasýda. Sottyń búgingi otyrysynda Máskeý oblysynan jer telimin satyp alý degen jeleýmen Muhtar Ábilázovtiń ofshorlyq kompanıasyna birneshe mıllıardtaǵan nesıe berý oqıǵasy qaraldy. Bul epızod ta basqalarǵa uqsas: tergeýdiń málimetteri boıynsha nesıege berilgen aqsha bankke qaıtarylmaǵan, Muhtar Ábilázov urlaǵan mıllıardtaryn óziniń jeke qajettilikterine jumsaǵan.
BTA banktiń ókili Temirlan Nyǵmetovtiń aıtýyna qaraǵanda, 2008 jyly Ábilázovtiń nusqaýy boıynsha «bir kúndik» maqsat úshin «Bervich Holding Sarl» kompanıasy qurylady. Atap aıtarlyǵy, rezıdent bolyp tabylmaıtyn mundaı «bir kúndik» kompanıalardyń zańdy meken-jaıy retinde Brıtan Vırgın araldary kórsetilip otyrǵan. Tergeý nátıjesinde málim bolǵanyndaı, bul ofshorlyq kompanıanyń qujattaryn da Muhtar Ábilázov tikeleı baqylaýynda ustaǵan № 6 korporatıvtik bıznes basqarmasynyń qyzmetkerleri daıyndapty.
Arada biraz ýaqyt ótkennen keıin, BTA banktiń nesıe komıteti «Bervich Holding Sarl» kompanıasynyń nesıelik ótimin eshqandaı kedergisiz maquldaıdy. Nesıeniń maqsaty retinde Reseı Federasıasynyń Máskeý oblysyndaǵy Mytıshın aýdanyndaǵy kotejder qalashyǵyn salýdy qarjylandyrý dep kórsetiledi. Oǵan josparlanǵan aqshanyń kólemi 250 mıllıon AQSH dollaryn quraǵan.
Ádettegideı, nesıe komıtetiniń músheleri bul joly da bankten qaryz alýshynyń kepilge qoıatyn múlki, nesıelik tarıhy bolmaǵanyna kóz juma qaraǵany málim boldy. Tipti, atalǵan kompanıanyń nesıeleý salasynda eshqandaı tájirıbesi bolmaǵany da eshkimdi oılandyrmaǵan. Buǵan qosa, Vırgın araldarynda ornalasqan kompanıa Máskeý mańyndaǵy kotejder qalashyǵyn qarjylandyrady degenniń ózi aqylǵa syımaıdy. Alaıda, aıqyn nárselerge qaramastan nesıelik ótinim birden maquldanǵan.
Sotta prokýrorlar oqyǵan kýágerlerdiń sózinen málim bolǵanyndaı, banktiń nesıelik bólimine tikeleı Ábilázovtiń ózi baqylaý jasaǵan. Sol sebepten, «Bervich Holding Sarl» kompanıasyna mıllıondaǵan nesıelerdi bererde bank qyzmetkerleri eshteńege basyn qatyrmaǵan. Sonymen qatar, nesıe komıtetiniń músheleriniń eshqaısysy qaryz alýshynyń ókili retinde kórsetilgen Lúksembýrgtegi áldebir Manacor atty myrzamen baılanys ornatpaǵan. Tergeýdiń boljamynsha, mundaı adam ómirde joq.
Temirlan Nyǵmetov sot otyrysynda habarlaǵandaı, nesıeni maquldaýǵa qatysty formaldy túrdegi is-sharalar júzege asyrylǵan soń, «Bervich Holding Sarl» kompanıasynyń shotyna birneshe transhpen shamamen 230 mıllıon AQSH dollaryna jýyq qarajat aýdarylady. Kóp uzamaı ofshorlyq kompanıanyń shotyna túsken qarjyny Muhtar Ábilázov qolma-qol aqshaǵa aınaldyryp, óziniń jeke basynyń qajettilikterine jumsaıdy.
Týra osyǵan uqsas kestemen Muhtar Ábilázov «Highbond Associated LTD» ofshorlyq kompanıasyna da nesıe berý arqyly BTA bankten taǵy da 110 mıllıonnan astam AQSH dollaryn jymqyrypty. Buǵan deıingi epızodtan bir ǵana aıyrmashylyǵy, bul joly nesıeniń maqsaty Reseı Federasıasynyń Máskeý oblysyndaǵy Domodedovo aýdanynan jer telimin satyp alýǵa «Rýsskaıa nedvıjımost JAQ-yn qarjylandyrýǵa jumsalady dep kórsetilgen. Basqasha sóben aıtsaq, BTA banktiń qyzmetkerleri ótinimderdi rásimdegen kezde jer ýchaskeleriniń ornalasqan jeri men qaryz aqshanyń somasyn ǵana ózgertip otyrǵan.
Avtory: Sholpan Orazbekova
