Aqtóbede mektep oqýshysyn ógeı ákesi zorlap, qorlyq kórsetken. 6 klass oqýshysy úıine qaıtqysy kelmeıtinin aıtyp, apaıynan kómek suraǵan. Anasy basqa qaladaǵy aýylyna ketkende ógeı ákesi 13 jastaǵy qyzǵa oıyna kelgenin jasaıtyny belgili boldy dep habarlaıdy Qamshy aqparattyq agenttigi Nur.kz portalyna sileme jasap.

«Bul oqıǵany biz 3 mamyr kúni estidik. Jaǵdaıdy mektep qyzmetkerleri anyqtady. Sońǵy kúnderi balanyń kóńil kúıi bolmaı júrgen. Jetekshisi oqýshymen sóıleskende bala úıine barǵysy kelmeıtinin aıtqan.

«Sońǵy kezderi papam ishimdikke salynyp júr, úıge barsam urysady» degen. Synyp jetekshisi jaǵdaıdy maǵan baıandady. Men birden ýchaskelik polısıany shaqyrdym. Kómelettik jasqa tolmaǵandarmen jumys bóliminiń ınspektorlary keldi.

Bala birinshi kúni «ákem ishse urady» degennen basqa eshteńe aıtqan joq. Ol qorqyp turǵannan keıin úıine jibermeı, sol kúni apaıynyń úıine qondy», - deıdi Sazdy orta mektebiniń dırektory Marat Mahambetálıev.

Polısıa qyzmetkerlerin ertip, mektep dırektory bala turǵan úıge de barǵan. Anasy úıinde bolmapty. Qyzdyń sheshesi múgedek bolyp týylǵan ekinshi balasyn Qyzylordaǵa alyp ketken. Sol jaqta qujattaryn rettegenshe birinshi qyzyn ógeı ákesimen qaldyrady.

Kishkentaı qyzben jalǵyz qalǵan ógeı ákesi ony uryp, jynystyq qatynasqa tartqan.

«Biz alǵashynda balaǵa ógeı ákeniń qol ketergeni týraly qujat jasap, qalalyq bilim bólimine habarladyq. Keıin balamen mektep psıhology qaıta sóıleskende oqýshy barlyq jaǵdaıdy baıandap berdi.

Iaǵnı, er adam balaǵa qol kóterip qana qoımaǵan, jynystyq qatynasqa tartqan. Sol jerde birden balamen jumys jasaǵan mektep qyzmetkerlerin shaqyrdym. Polısıaǵa habar berdik.

Ógeı ákesin turǵylyqty meken-jaıy boıynsha izdep baryp, sol jerde qamaýǵa aldy. Biz barǵan kezde er adam ishimdik iship alǵan», - deıdi mektep dırektory.

Mektep basshysy jasóspirimniń sabaq úlgerimi jaqsy ekenin aıtty. Synypta úzdik oqýshy sanalatyn ol qoǵamdyq jumystarǵa da belsene aralasyp kelgen.

Qazirgi ýaqytta zábir kórgen oqýshy da, onyń anasy da mektep muǵaliminiń úıine qonyp júr.

Otbasy Aqtóbege Qyzylordadan kóship kelgen. Áıel adam ekinshi kúıeýimen azamattyq nekede turypty.

Qazirgi ýaqytta oqıǵaǵa qatysty tergeý sharalary júrip jatyr.

Oqýshy qyzǵa qatysty medısınalyq tekserýler jasalyndy. Ógeı ákesiniń mektep oqýshysyn jynystyq qatynasqa májbúrlegeni birinshi ret bolmaýy múmkin.