Keıde óz álemimizde, elimizde bolyp jatqan jańalyqtardy oqyp, zaman ózgerdi me, álde adam ba dep kúrsinetin kezderimiz bolady. Biraq jer ǵalamsharyn meken etken adamdardyń barlyǵyn birdeı jamandyqqa qıa almaısyń. Iá, álemde jaqsylyqty esimizge túsirip, táýbemizge keltirip turatyn adamdar barshylyq. Olardyń is-áreketterin kórip, ózińe qaraısyń. Ol meniń de qolymnan keletin dúnıe ǵoı deısiń. Átteń, biraq qolyńnan keletin isti júregińniń isteýge yntyzar bolmaı turǵany ókinishti-aq. Barlyq máselelerdi aıtyp, qoǵam ózgerdi dep ótirik kúrsingenshe, sol máseleni sheshýge óz úlesimizdi qosqanda álem múldem basqasha bolatyn edi
Úlgi alarlyq azamattyń biri vetnamdyq Tong Fýok Fýka. Ol búkil álemdi tańqaldyrdy. Qamshy aqparattyq agenttigi onyń kópke úlgi bolǵan isin óz oqyrmandaryna usynady. Vetnamdyq er adam jasandy túsikten keıin balalardy qupıa túrde saqtap júrgen.
Onyń áıeli 2001 jyly aıaǵy aýyr bolyp alǵash ret áıelder klınıkasyna jatady. Ol sol jerge kirgen ekiqabat áıelderdiń barlyǵyn baqylap otyrǵan. Olar biraz ýaqyttan keıin kabınetten kózderine jas alyp shyǵady. Vetnamdyq erkek sol kezden bastap jasandy túsik jasatýmen kúrespekshi bolady. Olar qalaı óz týǵan balasyn ólimge qıady dep uzaq oılanady.
Tong alǵashynda klınıkanyń qasyndaǵy jerdi satyp alý úshin aqsha jınady. Ol jasandy túsik jasalǵan sábılerdi sol jerge saqtaýǵa sheshim qabyldap, ruqsat alyp bolǵannan keıin, birden iske kirisedi. Ol zırattardy kórgen áıelder jasandy túsik jasatýdy doǵaratyn shyǵar dep oılapty. Biraz ýaqyttan keıin Tongke «balamyzdy baǵa almaımyz, oǵan qarajatymyz jetpeıdi»,-dep analar kele bastady. Sol kezde ol buryn-sońdy oılamaǵan sheshim qabyldaıdy.
Tong balalardy óz qamqorlyǵyna alýǵa kelisim beredi. Zırattardyń qasynan ol taǵy da jer alyp, úı turǵyzady. Bul úı 100-den astam balalarǵa pana boldy..
Balalardy shatastyryp almas úshin olarǵa laqap at qoıady. Mysaly, Tam – «júrek», Vın – «abyroı», taǵy basqa.
Balalar óz anasynyń jáne qutqarýshysynyń tegimen ıelenedi. Tong balalardyń týǵan ata-anasynyń materıaldyq jaǵdaıy jaqsarǵan kezde olardy týǵan otbasyna tabystaıdy eken.
Aýdarǵan: Ásel Óteshova
