Búgin Qazaqstan musylmandary dinı basqarmasynyń uıymdastyrýymen Óskemen qalasynda belgili din qaıratkeri Halıfa Altaıdyń 100 jyldyǵyna arnalǵan «Bolashaqqa baǵdar: rýhanı jańǵyrý jáne Halıfa Altaıdyń ǵylymı murasy» atty halyqaralyq konferensıa ótti, dep habarlaıdy Qamshy aqparattyq agenttigi. Bul jóninde QMDB baspasóz qyzmeti jazdy.
Konferensıa jumysyna QMDB tóraǵasy, Bas múftı Erjan qajy Malǵajyuly, Reseıdiń Omby, Altaı aımaǵynyń múftıleri, QMDB-nyń ǵalymdary men ókil ımamdary, Halıfa Altaıdyń ómiri men ǵylymı murasyn zertteýshi ǵalymdar, dintanýshylar, zıaly qaýym ókilderi qatysty.
Atap aıtqanda, belgili ǵalym, ǵylym doktory Islam Jemeneı, M.Áýezov atyndaǵy Ádebıet jáne óner ınstıtýty Abaıtaný jáne jańa dáýir ádebıeti bóliminiń meńgerýshisi, profesor Serikqazy Qorabaı, respýblıkalyq Alashtaný ortalyǵynyń dırektory Turdyqul Shańbaı, Reseıdiń Omby aımaǵynyń múftıi Bota qajy Bakýlın, Reseıdiń Altaı Respýblıkasynyń múftıi Janbolat qajy Oqtaýbaev, t.b. ǵalymdar qatysyp, mazmundy baıandama jasady.
Bas múftı Erjan qajy Malǵajyuly óz baıandamasynda: «Tarıh qoınaýyna kóz júgirtsek, Saq, Ǵun, Túrik qaǵanaty, Qaraqan memleketi, Altyn Orda ımperıasy jáne Qazaq handyǵy dáýirlerinde ata-babalarymyz zamana úderisinen qalys qalmaı, qala men kóshpeli mádenıetti qatar damytyp, qal-qaderinshe ozyq órkenıet jasaýǵa umtyldy. Tarıhı sanamyzdy oıatý maqsatynda ult kóshbasshysy N.Nazarbaevtyń uıytqy bolýymen 2004 jyly «Mádenı mura» baǵdarlamasy aıasynda Qazaqstan aýmaǵyndaǵy tarıhı-mádenı eskertkishter men nysandar jańǵyrtyldy. Al 2013 jyly «Halyq – tarıh tolqynynda» baǵdarlamasy arqyly álemniń eń beldi arhıvterinen tól tarıhymyzǵa qatysty qujattardyń kóshirmesi elge ákelindi. Bul Elbasy aıtqan rýhanı jańǵyrýǵa ázirlik ispetti atqarylǵan eren eńbekter edi. Osy turǵyda Qazaqstan musylmandary dinı basqarmasy da 2013-2015 jyldar aralyǵyn «Din men dástúr sabaqtastyǵy» jyly dep jarıalap, osy merzim ishinde salt-dástúrimiz ben asyl dinimiz keńinen nasıhattaldy. Sonymen birge, 2016 jyl – «Din jáne tarıh taǵylymy» jyly dep atalyp, taǵylymǵa toly tarıhymyz týraly birneshe zertteýler jarıalanyp, kitaptar jaryq kórdi, konferensıalar men dóńgelek ústelder uıymdastyryldy. Bul bizdiń Elbasynyń saıasatyn árdaıym qyzý qoldaıtynymyzdy jáne QMDB-nyń qoǵam úderisinen tys qalmaıtynyn kórsetti», – dep atap ótti.
Aıta keteıik, konferensıanyń maqsaty – Elbasynyń «Bolashaqqa baǵdar: rýhanı jańǵyrý» atty maqalasyn nasıhattaý, Táýelsizdik jyldaryndaǵy elimizdegi dástúrli ıslamnyń damý barysyn saralaý, Halıfa Altaıdyń eńbekterin nasıhattaý, jat aǵymdardyń aldyn alý, dástúrli ıslamǵa negizdelgen ulttyq qundylyqtardy tanytý t.b.
Sholýshy: Gúlim Jaqan
