Qazaqstannyń halyqaralyq qatynastar jónindegi keńesiniń quryltaı jınalysynda Parlament Senatynyń Tóraǵasy Qasym-Jomart Toqaev osy birlestiktiń qurmetti tóraǵasy bolyp saılandy dep habarlaıdy Qamshy aqparattyq agenttigi Parlamenttiń baspasóz qyzmetine silteme jasap.

Keńes halyqaralyq qatynastar salasyndaǵy otandyq sarapshylardy biriktirý jáne Prezıdent Nursultan Nazarbaevtyń mańyzdy bastamalaryn ilgeriletý, sondaı-aq jahandyq turǵydaǵy kún tártibinde turǵan eń ózekti máselelerdi talqylaý jáne usynystar ázirleý úshin quryldy.

Qasym-Jomart Toqaev óz sózinde «Álem damýyndaǵy aǵymdardy jan-jaqty ári tereń taldaý negizinde Keńes Qazaqstannyń syrtqy saıasatyndaǵy negizgi máseleler boıynsha ınovasıalyq qadamdar ázirleıtin alań bolýy tıis», dep atap ótken bolatyn.

Otyrys barysynda qurylǵan organnyń 2017 jyly qyzmetiniń negizgi baǵyttary belgilendi. Sheteldik áriptesterdiń qatysýymen sarapshylar forýmyn ótkizý, zertteý granttary men stıpendıalar taǵaıyndaý, sondaı-aq jas sarapshylarǵa arnalǵan Jazǵy mektep uıymdastyrý josparda tur.

Saıasattanýshy Erlan Karın Keńestiń tóraǵasy boldy. Syrtqy ister mınıstri Qaırat Ábdirahmanov, Parlament Májilisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev, otandyq jetekshi taldaý ortalyqtarynyń basshylary Keńes Tóralqasynyń quramyna endi.