Almaty ákimi Baýyrjan Baıbek Naýryzbaı aýdanyn damytý boıynsha kóshpeli jıyn ótkizdi, munda jaqyn arada jańa ákimshilik ortalyqtyń, 1200 oryndy mekteptiń, kúnine 500 jáne 200 adam qatynaıtyn eki emhananyń qurylys jumystary aıaqtalatyn bolady, dep habarlaıdy Qamshy aqparattyq agenttigi qala ákimdiginiń baspasóz qyzmetine silteme jasap.
Naýryzbaı aýdanynyń ákimi Saıran Saıfedenov bıylǵy jyly Qalqaman yqsham aýdanynda jańa joldar salý josparlanǵanyn, uzyndyǵy 17 km bolatyn 32 kósheniń jańartylatynyn, uzyndyǵy 26 km bolatyn 22 kóshege ortasha jóndeý jumystary júrgiziletinin aıtty.
Bulardan ózge, Jandosov kóshesi kúrdeli jóndeýden ótedi, Saıyn kóshesiniń qıylysynan Taýsamaly poselkesine deıin jalpy uzyndyǵy 2,08 km bolatyn jol salynady. Jóndeý jumystary barysynda joldardyń kólik qozǵalatyn bólikteri tórt jolaqqa deıin keńeıedi, Qarǵaly ózeniniń boıyndaǵy kópir qaıta jasalady, velojoldar men trotýarlar salynady. Qala basshysyna kóshelerdi kúrdeli jóndeýden ótkizý jumystaryn merziminen buryn, qyrkúıek aıynda aıaqtaýdy josparlanǵany aıtyldy.
Óziniń jumys sapary barysynda qala ákimi Aqjar yqsham aýdanyndaǵy iske qosylmaǵan «Edelveıs» bala baqshasynda boldy. Nysannyń jalpy alańy 1805 kv.metr, 2007 - 2017 jyldary Memlekettik múlik jáne jekeshelendirý Komıteti bala baqshany «Sentr Vıd» JSHS senimdi basqarýǵa bergen. Alaıda, bala baqsha kúni búginge deıin bos turǵan. Qala basshysy bala baqshany ashý úshin tıisti sharalar qabyldaýdy tapsyrdy. Atap óterlik jaıt, Naýryzbaı aýdanynda 3 jastan 6 jastaǵy 668 balaǵa mektep jasyna deıingi balalar mekemelerinde oryn jetpeıdi, al 1 jastan 6 jasqa deıingi 1419 baldyrǵan bala baqshaǵa zárý.
Sholýshy: Gúlim Jaqan
