Portýgaldyq Romeo men Djýlıetta atanyp ketken I Pedro patsha men onyń súıiktisi týraly sóz qozǵamaqpyz.
1339 jyly IV Afonsý patshanyń murageri ákesiniń buıryǵymen súımese de Konstanse Kastılskoǵa úılenedi. Toı kezinde Konstantamen birge freılınder de keledi. Onyń ishinde Inesh de Kashtrý da bar edi. Bolashaq patsha men Inesh bir-birine bir kórgennen ǵashyq bolyp qalady.
7 jyl ótkennen keıin Pedronyń áıeli bosanyp jatqan ýaqytta qaıtys bolady. Osydan keıin patsha Ineshke degen sezimin jasyrmaı, ony saraıǵa alyp kelip úılengisi keletinin aıtady.
Pedronyń ákesi bul nekege úzildi-kesildi qarsylyǵyn bildiredi. Sebebi Inesh Portýgalıany Kastılıııalar bılegenin qalaıtyn kastılskıı urpaǵyna jatatyn. Sondyqtan Afonsý bul neke soǵysqa alyp keledi dep qoryqty.
Ineshti Pedrodan alystatý úshin saraıdan shyǵardy, qorqytty, qoqan-loqy kórsetti. Alaıda ǵashyqtardyń mahabbaty kúsheıe tústi.
Inesh pen Pedronyń 4 balasy boldy. Eger onyń barlyǵy taqqa talassa elde azamattyq soǵys bastalyp ketýi múmkin edi. Patshanyń keńesshileri bul tyǵyryqtan shyǵýdyń joly - Ineshti óltirý ekenin aıtady.
Afonsý balasyn áskerı joryqqa jiberedi de, Ineshke jaldamaly kisi óltirýshilerdi jiberdi.
Patshanyń qaýpi týra keldi. Azamattyq soǵys bastaldy. Tek ony bastaýshy óziniń uly Pedro edi. Ol súıiktisin óltirýge tapsyrma bergen ákesinen osylaısha kek aldy. Eki jyldan keıin patsha qaıtys boldy. Taqqa I Pedro otyrdy.
Eń aldymen jańa kelgen patsha Ineshti óltirgenderdi jazalady. Olardy taýyp, júrekterin sýyryp alǵan. Osydan keıin Pedro súıiktisi Ineshke úılenedi. 1361 jyldyń 25 maýsymynda neke qıý rásimi ótti. Ineshtiń qaıtys bolǵanyna 6 jyl ótkennen keıin ony sarkofagtan alyp shyǵyp, toı kóılegin kıgizip, taqqa otyrǵyzǵan.
Pedro ǵashyǵyna táj kıgizdi. Osydan keıin saraı qyzmetkerleriniń barlyǵy Ineshtiń qolynan súıip, adal bolýǵa ýáde berdi. Neke qıý rásiminen keıin máıitti sarkofagqa salyp, Alkobastaǵy monastyrde qaldyrdy. Pedro munyń barlyǵyn súıiktisin patshalyq zıratqa jerleý úshin jasaǵan degen boljamdar bar.
1367 jyly Pedro qaıtys boldy. Onyń óler aldyndaǵy tilegi boıynsha, Pedrony súıtisi Ineshtiń janyna jerledi.
Inesh pen Kashtrýdyń neke qıý rásimi týraly eshqandaı qujat tabylmaǵan. Sondyqtan kóptegen synshylar munyń ańyz ekenin aıtady.
Atalmysh oqıǵa teatr sahnalarynda qoıyldy. Al 2009 jyly Fransıada «Óli patshaıym» atty fılm túsirildi.
Daıyndaǵan: Ásem Álmuhanbet
