Qalada jańa turǵyn úıler salynsa, tóbesi kókke jetetin qarapaıym turǵyn kúnderdiń birinde mindetti túrde kóńilderi kóoldeı basylady. Bul úrdis elimizde daǵdyǵa aınalyp ketkendeı. Sebebi, birneshe qomaqty somadaǵy qarajatqa salynǵan «sapaly bolýy tıis» turǵyn úıler 5-6 jylǵa da shydamaı qulap jatady, dep jazady Qamshy aqparattyq agenttigi.
Almaty arnasynyń habarlaýynsha, Alǵabas yqshamaýdanynyń turǵyndarynan taǵy maza ketti. Sáýirde jaýǵan jaýynnan soń, onsyz da irgetasy syr bergen №156 úıdiń ústińgi qabaty aýytqı bastapty. Áýelde buǵan mán bermegen halyq, baspanalarynyń qabyrǵasy kún saıyn aıtarlyqtaı eńkeıip bara jatqanyn baıqaǵan. Mańaıdaǵy úılerdiń irgetasyn nyǵaıtyp jatqan jumysshylar, turǵyndarǵa bul baspananyń qabyrǵasy 40 smge deıin qısaıǵanyn aıtypty. Sodan beri jurttyń úreıi ushyryp otyr.
«Byltyr 15 sm qısaıdy, komısıa buny qalypty dep aıtty dedi. Jarty aı buryn 24 dedi. Al, keshe bir jumyskerden bildirtpeı surasaq, ol 40 sm dep aıtty. Jarty metrge úıimiz qısaıyp tur. Sondyqtan, bizde túnde uıqy joq, kúndiz kúlki joq. Balalarymyzdy jeke úıge tastaýǵa qorqamyz»,- dedi qala turǵyny Gúlnár Káripjanqyzy.
«Úıdiń jaǵdaıy otyrǵanda kádimgideı bireý qozǵap turǵan sıaqty syqyr-syqyr etedi. Esikter án salady. As bólmemniń esigin syqyrlaı bergesin alyp tastadym»,- dedi taǵy bir quala turǵyny.
Dabyl qaqqan jurttyń jan aıqaıyn jergilikti ákimdik estigen. Biraq, atqaminerler úıdi apatty deýden aýlaqpyz deıdi. Óıtkeni, baspananyń 40 smge aýytqyǵany, el arasyndaǵy jańsaq pikir kórinedi.
«Bireýler arasynda sol turǵyndardyń ótirik aıtqan. 40 sm ketip qaldy, senderdiń úı qaýipti dep. Sony bireý jiberip, elder úrkip qaldy»,- dedi Alataý aýdanynyń ákimi, Baǵdat Mánizorov..
Memlekettik baǵdarlamamen salynǵan úı osydan 3 jyl buryn qoldanysqa berilgen. Kóppen birge qýanyp, qonys toıyn toılaǵandardyń biri Aınur Qobylandy. Medısına qyzmetkeri bul páterge uzaq jyl kezekke turyp qol jetkizgen. Sol qýanyshy endi kópke sozylmaıtyn túri bar. Qazir Aınur turǵan úı aýtqyǵany óz aldyna, qabyrǵalaryna da jaryq túsip, syrtqy sylaqtar sógile bastaǵan.
Záre quty qashqan turǵyndar úıleriniń apatty ekenin aıtyp tótenshelikterge shaǵymdanǵan. Alaıda, qutqarýshylar baspanadan turǵyndardy kóshiretindeı qaýip joq dep kesip aıtypty. Dese de, qısaıǵan qabyrǵadan qoryqqan halyq mamandar nysandy muqıat tekserip, qanshalyqty qaýipti, qaýipsiz ekenin anyqtap berse dep otyr.
Sholýshy: Gúlim Jaqan
