Qýraıly aýyldyq okrýginiń ákimi Maqpal Turmaǵambetova telemunaradan sekirip ketip, qaza tapqan erli zaıyptyny qalaı qutqarmaq bolǵany jaıly aıtyp berdi, - dep habarlaıdy Qamshy aqparattyq agenttigi Tengrinews.kz basylymyna silteme jasap. Sýısıd jasaǵan Vladımır Shýster men Asel Dúısenbaeva osy aýylda turǵan. 

Aıta keteıik, marqum áıeldiń artynda jeti jasar qyzy, al er adamnyń artynda úsh jasar balasy qaldy. Sonymen qatar, Aqtóbe bilim basqarmasynyń málimetinshe, qaza tapqan áıel júkti bolǵan. 

Ákimniń aıtýynsha, qaıǵyly oqıǵa aldynda televızıalyq munaraǵa barlyq atqarýshy jáne quqyq qorǵaý organdary barǵan. 

"Men bul balalardy bilemin (erli-zaıypty Vladımır men Aseldi aıtyp otyr - Avt.). Ózim emdelip júrsem de, júregim shydamaı, oqıǵa ornyna asyqtym. Kómegim tıip qalar dep oıladym. Jetkenimde olar joǵaryda turdy, eshkimdi tyńdamady. Munaraǵa eshkimdi jolatpady. Polısıaǵa da, qutqarýshylarǵa da tyıym saldy. Tipti Aseldiń sheshesi jaqyndaǵysy kelgen, jylap, ótingen, biraq ony da jaqyndatpady. Mundaı bolady dep oılaǵan da joqpyn. Ókinishke qaraı, biz kómektese almadyq. Olar sekirip ketti. Olar jaqsy otbasydan shyqqan. Shýsterdi ata-ájesi baqqan, aýylda barlyǵymen birdeı-aq turmys keship jatqan. Asel de solaı. Ekeýi kórshiles turǵan", - deıdi Maqpal Turmaǵambetova.

Sóıtsek, telemunara eski ári jumys istemeı turypty. Ákimniń sózinshe, telemunara eshqashan qorshalmaǵan.

"Olar shamamen 70 metr bıikke kóterildi. Oǵan shyǵýǵa arnalǵan baspaldaq bar. Ár deńgeıinde alańy bar. Olar sol alańdardyń birinde turdy. Men oqıǵa ornynda barǵanda olarmen sóılese bastadyq. Polısıanyń dybys zoraıtqyshy boldy. Bastapqyda men aıǵaılap kórdim, biraq qıyn boldy, sondyqtan polıseılerdiń apparatyn alyp, olarmen sóılese bastadym. Bastapqyda olar qorshaýdyń syrtynda turdy, ıaǵnı endigi sekirýge daıyn turdy. Menimen sóıleskennen keıin sabyrǵa kelgendeı bolǵan, qaýipsiz jerge qaraı jyljyǵan, sosyn olar bir-birimen janjaldasyp qaldy, ne aıtyp jatqanyn estı almadyq. Tómenge túsýge keliskendeı de bolǵan edi. Biraq... qaıǵyly oqıǵa boldy. Joǵaryda arnaıy sym bolǵan, ekeýi de soǵan ilinip aldy da, bir ýaqytta jibere saldy", - dep baıandady oqıǵany kýáger.

Sonymen qatar, onyń aıtýynsha, Vladımır Shýster men Asel Dúısenbaeva esirtki qoldanbaǵan.

"Mundaılaryn baıqamadym. Qazir naqty birdeńe dep rastap sóıleýden qorqamyn. Sektaǵa da jolamaǵan. Mundaılaryn eshqashan baıqalmaǵan. Aseldi bala kezinen bilemin. Jaqsy qyz edi. Árdaıym kúlip-oınap júretin. Ómirlerinde bir ózgeris bolǵan shyǵar, biraq onysyn eshkim baıqamady. Al bizdiń Vovkany Shýstık dep ataýshy edik, ol kezinde týberkýlezge shaldyqqan, keıin emdelgen. Ol jaqsy jumys istedi. İship júrgenin de baıqamaǵanmyn. Árdaıym kólikpen júretin. Jaman sóz aıta almaımyn. Muny estigende eseńgirep qaldym", - deıdi ol. 

Eske salaıyq, oqıǵa 15 mamyrda bolǵan. Erli zaıypty telemunaraǵa shyǵyp, sekirip ketken. Olar oqıǵa ornynda qaza tapty. Keıin erli-zaıyptyǵa qatysty jantúrshigerlik derekter anyqtaldy. Óz kezeginde Aqtóbeniń bilim basqarmasyndaǵylar ákesi men ógeı sheshesi telemunaradan sekirip ketip, qaza tapqan jeti jasar Krıstına Shýster jaıly aıtyp bergen bolatyn.