Qazaqstan kúıshileriniń odaǵy qurylady dep habarlaıdy Qamshy aqparattyq agenttigi. Bul týraly belgili kúıshi Erbolat Mustafa jazdy.

«Súıinshi! Qurmetti aǵaıyn! Qazaq tarıhynda tuńǵysh ret Qazaqstan Kúıshileriniń Odaǵy qurylmaqshy. Konsert zaldarynyń esiginen syǵalap, jetim balanyń kúıin keship júrgen kıeli kúı óneriniń janashyrlary ún qosady dep senemiz. Asqar taýdan bastaý alǵan móldir bulaq ushan teńizge aınalatyny sıaqty, ulttyq ónermen sýsyndaǵan ónerpaz ǵana bıik belesterge jete alady. Al, aǵaıyn, iske sát! "Kúı óneri" atty taýdyń shyńynda turǵan Shámil aǵaǵa qolqabys tıgizeıik» degen kúıshi óziniń áleýmettik jazbasynda.

Belgili bolǵandaı, kúıshi-dombyrashy, Qazaqstannyń eńbek sińirgen qaıratkeri Shámil Ábiltaı prezıdent Nazarbaevtyń atyna kúı murasyna janashyr bolýyn surap hat jazǵan. Oǵan jaýap bergen Mádenıet jáne Sport vısemınıstri Musaıbekov kúıshige Almaty qalasynyń Ádilet departamentine tıisti qujatty ótkizýin suraǵan.

Aıta ketsek, Kúı – qazaq halqynyń tól murasy. Kúı XIV ǵasyrda jeke mýzykalyq janr bolyp qalyptasty. Kúıler mazmuny ańyz-ertegilerge, naqtyly tarıhı oqıǵalarǵa qurylyp, kóbine baǵdarlamaly túrinde damydy. Onda halyqtyń basynan ótken taýqymet men ádiletsizdikke qarsy kúresi, azat ómirdi ańsaǵan asyl armany men qýanysh sezimi tereń tolǵanyspen órnek-boıaýyn tapty.