Májiliste keıbir zańnamalyq aktilerge áleýmettik qamsyzdandyrý máseleleri boıynsha ózgerister men tolyqtyrýlar engizý týraly zań jobasy maquldandy, dep habarlaıdy Qamshy aqparattyq agenttigi Sputnik basylymyna silteme jasap.
2017-2018 jyldary búdjetten tólenetin zeınetaqynyń mólsheri 3 kezeńde arttyrylady, dep habarlady QR Eńbek jáne halyqty áleýmettik qorǵaý mınıstri Tamara Dúısenova.
"Elbasynyń bıylǵy Joldaýynda bergen tapsyrmasyna sáıkes 2017-2018 jyldary búdjetten tólenetin zeınetaqylar mólsheri 3 kezeńde arttyrylatyn bolady. Birinshi kezeńde, ıaǵnı, 2017 jylǵy birinshi qańtardan bastap yntymaqty zeınetaqylar mólsheri toǵyz paıyzǵa, bazalyq zeınetaqy jeti paıyzǵa artty. Al ekinshi kezeńde, 2017 jylǵy birinshi shildeden bastap yntymaqty zeınetaqy mólsheri qosymsha 11 paıyzǵa, al bazalyq zeınetaqy mólsheri 13 paıyzǵa kóbeıtilgeli otyr", — dedi Dúısenova Májilistiń jalpy otyrysynda.
Nátıjesinde 2017 jylǵy birinshi shildeden bastap zeınetaqyny 2016 jylǵy zeınetaqy mólsherimen salystyrǵanda 20 paıyzǵa arttyrý qamtamasyz etilmek. Iaǵnı, eń tómengi zeınetaqy 45 711 teńge, ortasha zeınetaqy 66 676 teńgege deıin arttyrylatyn bolady. Bul ósim barlyq eki mıllıonnan astam zeınetkerlerdi qamtıdy.
"Sonymen qatar, 2017 jylǵy birinshi shildeden bastap zeınetaqy taǵaıyndaý úshin esepke alynatyn tabystyń eń joǵary mólsherin 41 aılyq eseptik kórsetkishten 46 aılyq eseptik kórsetkishke deıin arttyrý kózdelgen. Bul 2017 jyldyń birinshi jartysynda taǵaıyndalǵan zeınetaqylardyń 11 paıyzǵa artý esebimen osy jyldyń ekinshi jartysynda taǵaıyndalatyn zeınetaqylar mólsheriniń tepe-teńdigin qamtamasyz etý úshin qaralyp otyr", — dedi ol.
Zeınetaqyny arttyrýdyń úshinshi kezeńi 2018 jylǵy birinshi shildeden bastap júrgiziletin bolady. Bul bazalyq zeınetaqyny taǵaıyndaý ádistemesiniń ózgerýimen baılanysty.
"Búgingi tańda bazalyq zeınetaqy zeınetkerlik jasqa jetken adamdarǵa birdeı mólsherde taǵaıyndalady. Jańa ádistemege sáıkes bul zeınetaqy júıesine qatysý ótiline baılanysty bolǵaly otyr. Bul rette 1998 jylǵa deıingi eńbek ótili jáne 1998 jyldan keıingi jınaqtaýshy zeınetaqy júıesine aýdarylatyn zeınetaqy jınaqtarynyń merzimi eskeriledi. Bazalyq zeınetaqy barlyq zeınetkerler úshin olardyń zeınetaqy qujattaryndaǵy 1998 jylǵa deıingi eńbek ótiline qaraı eseptelinetin bolady. Bul oraıda aıta ketetin jaıt, zeınetkerlerge eńbek ótili týraly qosymsha qujattardyń usynýy qajet bolmaıdy. Sonymen birge qatysý ótiline jınaqtaýshy zeınetaqy júıesine aýdarymdar jasaǵan kezeń de kiredi. Bul jaǵdaıda qosymsha anyqtamalar talap etilmeıdi", — dedi Dúısenova.
