«Almaty Arena» sport kesheninde jýrnalıser arasynda toǵyzqumalaqtan Aikyn Media Open týrnıri ótti. Bul shara «Aıqyn» respýblıkalyq qoǵamdyq-saıası gazetiniń 13 jyldyq mereıtoıyna oraı ótkizilgen kezekti shara. Esterińizge sala ketsek, osyǵan deıin redaksıa ujymy shahmat sheberin anyqtaıtyn dúbirli doda uıymdastyrǵan edi.
Toǵyzqumalaq týrnırine Almaty qalasynyń jýrnalıserinen bólek, Astana, Qyzylorda oblysy, Ońtústik Qazaqstan oblysy, Almaty oblysynyń ókilderi qatysty. Jalpy sany 10 jup – 20 jýrnalıs baq synady. Oıynǵa toǵyzqumalaqtan ulttyq quramanyń bas bapkeri Aınur Jaqapbaeva men birinshi dárejeli tóreshi Azamat Qaldybaev tórelik etti.
Nurtóre JÚSİP,
«Aıqyn» gazetiniń bas redaktory:
–Búgingi ótkizilip jatqan týrnır Elbasynyń «Bolashaqqa baǵdar: rýhanı jańǵyrý» maqalasymen oraılas keledi ǵoı dep oılaımyn. Óıtkeni ultymyzdyń barlyq asyl qasıetin keıingi jas urpaq boıyna sińirýi qajet. Toǵyzqumalaqty aqparat maıdanynyń aldyńǵy shebinde júrgen jýrnalıser oınasa, aqylyna-aqyl, naqylyna naqyl qosylmaı ma degen oı bar. Sondyqtan osy týrnırdi ótkizýge nıet etip, alǵash ret bastap otyrmyz. Týrnırdiń sátti ótýi áriptesterimizdiń belsene qatysýyna baılanysty. Jýrnalıser oljaly bolyp, oza shaýyp jatsa, bárimizge de qýanysh. Jarystyń sátti ótýine Halyqaralyq toǵyzqumalaq federasıasynyń prezıdenti Álıhan Baımenova myrza tilektestigin bildirip otyr. Toǵyzqumalaq álem halqy oınaıtyndaı, kompúterlik júıege engizildi. Bul qazaqtyń ulttyq oıynynyń mereıli bıikke kóterilgeni. Muny bárimiz de qýana qoldaýymyz qajet. Sondaı-aq, qazaq ulttyq sport túrleri qaýymdastyǵynyń prezıdenti Bekbolat Tileýhan myrza da ulttyq oıyn túrlerin damytýǵa belsene atsalysyp júrgenin bárińiz de jaqsy bilesizder. Bul joly da qaýymdastyq jýrnalıser arasynda ótip jatqan saıysqa demeýshilik jasap otyr. Sondyqtan júlde qory qomaqty. Tek aqylmen, oımen, qısynmen, toǵyzqumalaqtyń tartysty ótýine atsalysýymyz qajet.
Úzdik shyqqandar men oıyn barysynda jaqsy nátıje kórsetkenderge demeýshiler tarapynan baǵaly syılyqtar tabys etildi. Atap aıtqanda, «Aıqynnyń» yntalandyrý syılyǵyna Gúlmıra Aımaǵanbet («Astana aqshamy» gazeti), Ómirbek Sansyzbaev (massaget.kz) jáne Asqat Shotaev (OQO, bloger) ıe boldy. «Qamshy» aqparattyq portalynyń tilshisi Alına Bolatbek «Úzdik oıynshy» atansa, QazAST baspasóz hatshysy Baný Núsipovaǵa demeýshilerdiń arnaıy syılyǵy tabys etildi. Júldeli úshinshi oryndy «Úrker» jýrnalynyń tilshisi Nurlan Qumar, ekinshi oryndy bloger Baqytjan Qadilbek ıelendi. «Ońtústik Qazaqstan» gazetiniń tilshisi Ǵabıt Saparbekov júzden júırik shyǵyp, bas báıgeni jeńip aldy. Jeńis tuǵyrynan kóringen júldegerlerge aqshalaı syılyq, bas júlde ıegerine Túrkıanyń Antalıasyna eki adamǵa ushaq bıleti tabystaldy.
«Aıqyn» gazeti múshel jasyna oraı «13 jyldyqqa – 13 shara» atty bastama kótergen bolatyn. Osyǵan deıin túrli týrnırler, kezdesýler ótkizildi. Alda áli alty shara bar. Ár jarystan keıin qatysýshylar «Aıqyn endi qandaı týrnır uıymdastyrar eken?» degen oımen tarqasady. Qazaqtyń eski salty – múshel toıyn otyz kún oıyn, qyryq kún toıyn toılap ótkeretin gazet ujymynyń aıtýynsha, básekege toly báıgeler endi bastalady.
