Almaty oblysynda jantúrshigerlik qaıǵyly oqıǵa boldy, dep jazdy Qamshy aqparattyq agenttigi.

31 arnanyń habarlaýynsha, týystary eki kún boıy izdegen nebari 9-10 jasar eki balanyń denesi eski sandyqtyń ishinen tabyldy. Aldyn ala jasalǵan boljam boıynsha, balalar tyǵylmaq oınap júrip, sandyqtyń ishinde tunshyǵyp qalýy múmkin delingen. Alaıda, ata-analar bul boljamǵa múldem senbeıdi. «Tunshyqqan bolsa, bólme ishindegi qan izderi qaıdan shyqty?» deıdi. Kúdik týdyrar jaıttar kóp. Ázirge bári jumbaq...

Joǵalyp ketken eki balany týǵan-týystary kúni boıy izdepti. Tek 14 mamyrda túngi 12 kezinde úı artyndaǵy shaǵyn saraıdyń ishindegi sandyqtyń ishinen eki balanyń óli denesin tabady. Ol sandyqty polıseıler saraptama júrgizý úshin ózderimen birge alyp ketipti.

Uzyndyǵy 1 metr bıiktigi 40 santımetrden asatyn shaǵyn sandyq temir qańyltyrmen qaptalǵan. Balalar kók sandyq ishinde biriniń ústinde biri jatty deıdi kórgender. Sandyq turǵan jerde, kimdiki ekeni belgisiz, qan izderi áli jatyr.

«Barsam, arǵy buryshta sandyq tur eken. Sandyqtyń ishinde ekeýi jatyr. Astynda Abylaı jatyr, Abylaıdyń qoly bylaı, onyń ústine meniń balamdy jatqyzyp qoıǵan. Balam bylaı búktelip ekeýi qushaqtasyp jatyr. Biz oıladyq bala tiri eken dep», - deıdi qaıtys bolǵan Ermek esimdi balanyń ákesi Dýlat Kádirbekov.

Aldyn ala málimet boıynsha, balalar oınap júrip sandyqqa kirgen. Al sandyq qaqpaǵyn japqanda ilmegi bekitilip qalyp, eki búldirshin tunshyǵyp ólgen. Alaıda Abylaı men Ermektiń týystary bul nusqaǵa senbeıdi. Ásirese, Ermektiń anasy ulynyń ólimine kórshisinen jáne ekinshi kúıeýinen kúdiktenedi.

«Skladtyń bári ashyq jatyr, shege-balǵalar shashylyp jatty. Ol da ashýmen kelip óltirip qoıýy múmkin. Odan da kúmándanamyn. Meniń bar shyryldaǵanym – balamdy óltirgen adamdy tapsa eken dep júrmin», - deıdi Ermektiń zar jylaǵan anasy Jansaıa Kádirbekova.

«Qandaı jaǵdaı bolǵanyn túsinbeı qaldyq, gram túsinbeı qaldyq. Kókten keldi ma balalardyń ólimi, jumbaq bolyp tur. Eshteńe aıta almaı turmyz ǵoı. Kimnen kórerimizdi bilmeı turmyz», - deıdi Abylaı esimdi ekinshi balanyń atasy Núrlan Imanǵazıev.

Abylaı men Ermekti oqıǵa bolǵan kúni kórdim degen jan joq. Qaıǵyly oqıǵaǵa qatysty qylmystyq isti oblystyq ishki ister departamenti óz baqylaýyna alǵan. Tergeý aıaqtalmaǵandyqtan polıseıler de tolyq málimetke sarań.

«Eki balanyń ólimine qatysty birneshe saraptama taǵaıyndaldy. Osy saraptamalar nátıjesinde oqýshylardyń neden qaıtys bolǵany anyqtalady. Nátıjelerdi qolǵa alǵan soń, aýyz toltyryp birdeńe aıtýǵa bolady», - deıdi Almaty oblystyq İİD resmı ókili Kóbeıhan Nurahmet.

Qos balanyń óliminen keıin Ashysaı aýylynan da maza ketken. Olar oqyǵan mektep te qara jamylyp otyr. 3-synypta oqyǵan Ermek pen 4-synyp oqýshysy Abylaı týraly ustazdary da, mektep basshysy da tek jaqsy minezdeme berdi. Al eki birdeı otbasyna qaıǵy ákelgen jumbaq ólimniń qupıasy qashan ashylary belgisiz.