Bir baı óler ýaqytynda ulyn shaqyryp alyp:
- Ulym, men ólgen soń juma saıyn qyz alyp, qala saıyn úı sal. As jeseń, bal je, - dep ósıet aıtypty dep jazady Qamshy aqparattyq agenttigi ihsan.kz -ke silteme jasaı otyryp.

Baı dúnıeden ótip, uly atasynyń ósıetin oryndaı bastaıdy: juma saıyn qyz alyp, qala saıyn úı salady, as ishse, bal iship, aqshasyn bitiredi. Sóıtip, jigit dalaǵa shyǵyp biraz júrip, bir úıilgen tastyń yǵynda, bórkin qolyna alyp, basyn ustap otyrǵan ýaqytta, bir jaqtan aqsaqal kelip jigitke sálem beredi. Jigit sálemin alǵan soń, ol adam janyna otyrady da, jigitke:
- Neǵyp otyrsyń? – deıdi.-

Jigit:
- Jaı otyrmyn, - dep jaýap beredi.

Aqsaqal:
- Shynyńdy aıt! – dep qysa bastaıdy.

Jigit esh nárse aıtpaıdy. Taǵy da aqsaqal:
- Syryńdy jasyrma! Men saǵan jaqsylyq kórsetemin, - deıdi.

Jigit:
- Meniń atam baı adam edi, sol atamnyń óler aldynda aıtqan ósıetin oryndaımyn dep kedeı boldym, - deıdi.

Aqsaqal:
-Qandaı ósıet aıtyp edi? – deıdi.

Jigit:
- Áýelgi ósıeti: «Men ólgen soń juma saıyn qyz al», - dep edi, men atamnyń sol ósıetin tutyp, juma saıyn qyz aldym. Ekinshi ósıeti: «Qala saıyn úı sal», - dep edi. Men qala saıyn úı saldym. Úshinshi ósıeti: «As ishseń, bal je», - dep edi. Men bul ósıetin de oryndap, ár kúni bal jedim. Solaı etip, úsh jylda barlyq aqsham taýsyldy, - deıdi.

Aqsaqal turyp jigitke:
- Sen atańnyń ósıetin uqpaǵan ekensiń, óıtkeni atańnyń: «juma saıyn qyz al» degeni: «áıelińmen syılas bol, qadirińdi ketirme. Sonda ǵumyr boıy tatý-tátti ómir súresiń» degeni. «Qala saıyn úı sal» degeni: «qala saıyn dostaryń bolsyn, barǵanda túsetin» degeni edi. «As ishseń, bal je» degeni: «eńbek istep, as ishseń, baldan tátti bolady» degeni edi, - dep qart óz jónine ketipti.

Aqsaqaldyń osy keńesinen keıin ol aqylǵa kelip, barlyq jaǵdaıyn rettegen eken.

Sholýshy:Ásel Óteshova