Qazaqstan zıaly qaýymynyń ókilderi jyr semseri, aldaspan aqyn Mahambet batyrdyń árýaǵyna duǵa baǵyshtady.
Atyraý oblysyndaǵy Qaraoı jerine Ánes Saraı, Sábıt Dosanov, Serik Turǵynbekuly, Qajyǵalı Muhambetqalıuly, Qasymhan Begmanov, Mereke Qulkenov, Esenǵalı Raýshanov, Rollan Sısenbaev, Aqushtap Baqtygereeva, Svetqalı Nurjan, Baýyrjan Halıolla, Gúlzada Nıetqalıeva, Sáýlesh Shátenova, Álıa Dáýletbaeva, Baqytgúl Babash syndy aqyn-jazýshylar jıyldy.
Qonaqtar batyrǵa duǵa baǵyshtaǵannan soń sol jerde uıymdastyrylǵan "Mahambet poezıasy kúni" saltanatty sharasyna qatysty. Jıylǵandar Mahambet tulǵasyn ulyqtap, tarıhtan syr shertip, óleń oqydy.
Shara kezinde sóılegen oblys ákimi Nurlan Noǵaev bul kúnniń toı toılaýmen qatar, kóp dúnıelerdi oı eleginen ótkizetin ýaqyt ekenin atap ótti.
"Elbasymyzdyń "Bolashaqqa baǵdar: rýhanı jańǵyrý" maqalasynda eldiń damýy jolynda eńbektengen azamattardy bilý, olardyń erlikterin, atqarǵan isterin halyqqa nasıhattaý, esten shyǵarmaı urpaqqa jetkizý máseleleri aıtyldy. Tarıhty qarasańyzdar qajet kezde ómir sahnaǵa elim, jerim, Otanym dep, azattyq jolynda janyn pıda etken talaı azamattardy shyǵaryp otyrǵan. Solardyń biregeıi Mahambet desek artyq bolmaıdy, – dedi aımaq basshysy.
Aıta ketelik, mundaı shara Atyraýda 2003 jyly IýNESKO-nyń qoldaýymen ótkizildi. Qazaqstannyń eńbek sińirgen qaıratkeri Qoıshyǵul Jylqyshıevtyń ıdeıasymen ótkizilgen "Mahambet poezıasy kúnin" bıyldan bastap jyl saıyn uıymdastyrý josparlanǵan. Shara aıasynda Mahambet syılyǵy taǵaıyndalyp, ár túrli salada ozyp shyqqandardy marappattaý qolǵa alynýy múmkin.
