Ońtústik Koreıada bir top otandasymyz taǵy tutqynǵa túsip qaldy. Elý shaqty azamatty áýejaı qyzmetkerleri birden jertólege túsirgen. Biraq ne úshin ustaǵandaryn eshkimge táptishtep túsindirmepti. Tek ushaqtan túsken boıda suraq-jaýaptyń astyna alyp, tar jerge qamap qoıǵan.

Árqaısy ártúrli sharýamen barǵan qazaqstandyqtar osylaısha 5 kúnnen beri jipsiz baılanyp otyr, - dep habarlaıdy Qamshy aqparat agenttigi KTK málimetine súıenip.

 Til bilmeıtin Qazaqstan azamattary tilmash ta taba almaı, birneshe kúnnen beri ash jatqanyn habarlaǵan.

 "Tek káris tilinde sóılesińder deıdi. Tilmash joq bolǵandyqtan tamaq surap ishe almaı otyrmyz. Biraz jigitter aýyryp jatyr. Kúnine azdaǵan sýsyn men jarty nan beredi, boldy", - deıdi Jasulan Ánýarbaev.

Jat eldiń jertólesine qamalǵan otandastarymyz sol jaqtan qonaqúıge tapsyrys berip, qaıtar bıletterin de alǵan eken. Biraq 5 kúnnen beri qamaýda qalyp, shash etekten shyǵynǵa battyq dep shyryldap otyr.

 "Barlyǵymyz qonaq úıdiń aqshasyn tólep qoıǵanbyz. Saqtandyrý qujattarymyz bar. Jeke basym Koreıany kórýge kelgen edim. Biraq qazir jertólede jatyrmyz", - deıdi Handamır Qudiretov.

 Al elimizdiń Syrtqy ister mınıstrligi Ońtústik Koreıada tek 16 azamattyń baryn rastady. Qazir olardyń máselesimen sol jaqtaǵy elshiler aınalysyp jatyr eken.

Syrtqy ister mınıstrliginiń málimetinshe, jat elde jipsiz baılanǵan otandastarymyz kóshi-qon zańyn buzǵany úshin Koreıaǵa kirgizilmepti. Sondyqtan, olardyń bir toby elge deportasıalanǵan. Inchhon áýejaıynda áli úsh otandasymyz qalypty. Olar Qazaqstanǵa erteń qaıtarylady.

Sholýshy: Aıgerim TAÝBAI