Ońtústik Koreıada bir top otandasymyz taǵy tutqynǵa túsip qaldy, dep jazady Qamshy aqparattyq agenttigi.

KTK arnasynyń málimetinshe, elý shaqty azamatty áýejaı qyzmetkerleri birden jertólege túsirgen. Biraq ne úshin ustaǵandaryn eshkimge túsindirmepti. Tek ushaqtan túsken boıda suraq-jaýaptyń astyna alyp, tar jerge qamap qoıǵan. Árqaısysy ártúrli sharýamen barǵan qazaqstandyqtar osylaısha 5 kúnnen beri jipsiz baılanyp otyr.

Inchhon áýejaıynda jatqan bul otandastarymyz Ońtústik Koreıaǵa ártúrli sharýamen barypty. Biri saıahattap, ekinshileri jumyspen, qalǵandary jumys izdep attanǵandar. Til bilmeıtin Qazaqstan azamattary tilmash ta taba almaı, birneshe kúnnen beri ash jatyrmyz deıdi.

«Tek káris tilinde sóılesińder deıdi. Tilmash joq bolǵandyqtan tamaq surap ishe almaı otyrmyz. Biraz jigitter aýyryp jatyr. Kúnine azdaǵan sýsyn men jarty nan beredi, boldy», - deıdi jertólede otyrǵan Jasulan Ánýarbaev.

Jat eldiń jertólesine qamalǵan otandastarymyz sol jaqtan qonaq úıge tapsyrys berip, qaıtar bıletterin de alǵan eken. Biraq 5 kúnnen beri qamaýda qalyp, shash etekten shyǵynǵa battyq dep shyryldap otyr.

Al elimizdiń Syrtqy ister mınıstrligi Ońtústik Koreıada tek 16 azamattyń baryn rastady. Qazir olardyń máselesimen sol jaqtaǵy elshiler aınalysyp jatyr eken.

Syrtqy ister mınıstrliginiń málimetinshe, jat elde jipsiz baılanǵan otandastarymyz mıgrasıalyq zańdy buzǵany úshin Koreıaǵa kirgizilmepti. Sondyqtan, olardyń bir toby elge deportasıalanǵan. Inchhon áýejaıynda áli úsh otandasymyz qalypty. Olar Qazaqstanǵa erteń qaıtarylatyn bolady.