"Qazaqstan" Ulttyq arasyndaǵy "Apta" baǵdarlamasynyń saraptamalyq ortalyǵy qazaq tilinde qapysyz sóıleıtin atqaminerlerdiń ondyǵyn jasady dep habarlaıdy Qamshy aqparattyq agenttigi.
Onynshy ornyn eki aı buryn Mańǵystaý oblysy ákimi bolyp taǵaıyndalǵan Eraly Toǵjanovtyń enshisine tıipti.
Al, toǵyzynshy orynǵa Atyraý oblysynyń ákimi Nurlan Noǵaev jaıǵasqan.
"Atyraý oblysy ákimi Nurlan Noǵaevtyń da tili jatyq, qazaqtyń jalpaq tilimen kez-kelgen máseleniń tigisin jatqyzyp jetkizedi. San alýan shara men alqaly jıyndarda qazaq tiliniń qadirin arttyryp sóıleıtin Nurlan Asqarulyn reıtıńimizdiń toǵyzynshy ornyna laıyq dep taptyq", – deıdi sarapshylar.
Segizinshi oryn Quqyqtyq salada aýqymdy reformalarymen kózge jıi túsip júrgen tulǵalardyń biri Bas prokýror — Jaqyp Asanovqa buıyrǵan.
Investorlardyń birine memlekettik tildiń mártebesi týraly aıtqan áńgimesi hıt bolǵan Aqtóbe oblysynyń ákimi Berdibek Saparbaev jetinshi orynǵa jaıssa, Qyzylorda oblysynyń ákimi Qyrymbek Kósherbaev aptanyń altylyǵyna ilikti.
"Tili mirdiń oǵyndaı saıasatkerlerdiń biri - Imanǵalı Tasmaǵambetov. San laýazymdy qyzmetterdiń tizginin ustaǵan Imanǵalı Nurǵalıulynyń kez-kelgen máselede shegelep sóıleıtinin buqara jaqsy biledi. Elimizdiń Reseıdegi Tótenshe jáne Ókiletti elshisiniń enshisinde — besinshi oryn", – deıdi "Apta" saraptamalyq ortalyǵy.
Sońǵy kezde jańa qyrynan tanylyp úlgergen qyzyl tildi sheshen Premer-mınıstr Baqytjan Saǵyntaev tórtinshi orynnan kórindi.
Úshinshi oryn Májilis depýtaty Bekbolat Tileýhannyń, al ekinshi oryn Nur Otan partıasy tóraǵasynyń birinshi orynbasary, sheshen sóıleýdiń has sheberi Muhtar Qul-Muhammedtiń úlesine tıipti.
"Muhtar Abraruly áýezdi tilimizde áýeletip sóılep, aǵylta jónelgende qazaq tiliniń qadirin biletin qaımana jurtty baýrap alady. Sheshen sóıleýdiń has sheberine ekinshi oryndy laıyq kórdik", – deıdi sarapshylar.
Birinshi oryndy osydan tórt jyl buryn Bolashaq baǵdarlamasy mereıtoıynda Elbasymen ádemi de tapqyr áńgime qurǵan, qazir prokýrordyń kómekshisi qyzmetin atqaryp júrgen Maqsat Ysqaqov ıelendi.
