Osy jyldyń 8 aqpany kúni Qytaıdan Qazaq Eline kóship kele jatyp, «Maıqapshaǵaı» kedendik baqylaý beketinde 59,900 AQSH dollary kedenshiler tarapynan tárkilengen jesir ana Gúljan Máýithanqyzyna qatysty apelásıalyq sot otyrys 1-shi maýsym kúni Óskemen qalasynda ótedi, dep habarlaıdy Qamshy aqparattyq agenttigi Baq.kz portalyna silteme jasap.

Kúlli eldiń qarsylyǵyn týdyrǵan bul oqıǵaǵa baılanysty alǵashqy sot otyrysy Zaısan qalasynda 17 naýryzda ótken bolatyn. Shyǵys Qazaqstan oblysy Zaısan aýdandyq soty jalǵyzbasty áıeldi 234-bap boıynsha aıypty dep tanyǵan. Sondaı-aq, 68 myń teńge aıyppul salyp, qalǵan 40 myń dollardy memleketke kiris retinde sheshken edi.

Ol sheshimge narazy bolǵan jalǵyzbasty ana apelásıalyq sotqa shaǵym túsirdi.

Qazaq qoǵamynda zor dúmpý týdyrǵan atyshýly bul oqıǵaǵa kúlli jurt nazar aýdaryp otyrǵany belgili. Ásirese, ózge elderden atajurtqa oralýdy maqsat etken san myńdaǵan qandastardyń osy oqıǵadan soń, býýly teńderin qaıta sheship, oılanyp, qorqaqtap qalǵany jasyryn emes.

«Apelásıalyq sot ońtaıly sheshim shyǵaryp, óz aqshamdy ózime qaıtarar dep úmittenemin. Al, ol aqsha qolyma tımese, eki balam men kelinimdi, inimdi, onyń bala-shaǵasyn qosqanda 8 adam baspanasyz, tıynsyz dalada qalǵaly turmyz», – deıdi jesir ana.