Qazaq óneriniń maıtalmany, akter Azamat Satybaldy buǵan deıin kıno túsirip, kórermen júregin jaýlaǵan. Qoǵamdyq máseleni ashyp, kórermenge oı saldy. Bul joly óziniń jeke Theater28 teatry "Kúıeýińizdi satyńyzshy" dep atalatyn qoıylymmen shymyldyǵyn ashty. Qoıylym 22 mamyrda Qýyrshaqtar teatyrynda kórsetildi, dep jazady Qamshy aqparattyq agenttigi.

Burynnan bar qoıylymdy zamanaýı turǵyda halyqqa usynǵan jas teatr búgingi tańdaǵy otbasylyq máseleni qozǵaı bildi, komedıa arqyly ádemi jetkizdi. Kórermenniń júreginen oryn tapqanyn zaldaǵy soǵylǵan uzaq shapalaqtan baıqaýǵa bolady.

Iá, kúıeý satylar, biraq eshqandaı aqshaǵa satylmaıtyn asyl qazyna bar, ol - sezim, mahabbat. Birin biri súıip qosylǵan qos ǵashyqtyń ómiri taqtadaı tegis bolmaıdy, bas qosqandaryna 5jyl tolsyn, 10 jyl tolsyn, alańsyz kúnderdiń birinde daýyl soǵady, nóser jaýady. Biraq bári ótkinshi, syn ǵana. Sol synnan qos ǵashyqty aman alyp shyǵatyn olardyń mahabbaty. Alǵash qol ustasqan kúni eki jas bir-birine júrekterin tapsyrady. Sol júrekti aıalap ustaý - ekeýi úshin de úlken jaýapkershilik, jeńil bolyp kóringenimen.

Qoıylymdy tamashalaýǵa Muhtar Áýezov atyndaǵy Qazaq memlekettik drama teatrynyń kórkemdik jetekshisi Esmuhan Obaev, qazirgi «TTT» teatrynyń dırektory Asylbek Boranbaev jáne elimizdegi óner juldyzdary men BAQ ókilderi keldi. Esmuhan Obaev shymyldyǵyn endi ashqan jańa teatrǵa aq batasyn berip, Azamat Satybaldyǵa razylyǵyn bildirip, alǵys aıtty. Teatrdyń artyǵy bolmaıdy deı kele, áli de talaı bıikterden kórinetinine kámil senetinin aıtty.

Foto Maqsat Qusaıynov

Gúlim Jaqan