Elimizdiń mádenı astanasynda Almaty qalasy jastar saıasaty máseleleri jónindegi basqarma qoldaýymen, Almaty jastarynyń kongresi men  Almaty stýdentter alánsynyń uıymdastyrýymen, 14-25 jas aralyǵyndaǵy 300-ge jýyq jas  ónerdiń 17 túrinen ózara baq synaǵan kólemdi «Almaty qalasy jastarynyń delfıı oıyndary-2017» baıqaýy aıaqtaldy dep habarlaıdy Qamshy aqparattyq agenttigi. Delfıı oıyndary –qatysýshylar  arasynan talantty tulǵalar men erekshe daryndy jastardy iriktep alýǵa baǵyttalǵan, klasıkadan bastap qazirgi zamanǵa deıingi ónerdiń barlyq túrin biriktiretin keshendi baıqaý. Olımpıada oıyndarymen birge ejelgi Gresıa jerinde dúnıege kelip, XX-ǵasyrda qaıta jandana bastaǵan delfıı oıyndary búginde álemniń 100-ge tarta memleketinde qoldaý tapqan. Qazaqstan Ulttyq delfıı oıyndaryn bıyl XIII-ret ótkizdi. Oıyndar jas talanttardy taýyp, olardy qoldaý, óskeleń urpaq arasynda mádenı murany nasıhattaý, olarǵa rýhanı, estetıkalyq tárbıe berý, mádenıetaralyq dıalog pen ulttyq ónerdiń damýyna yqpal etýdi kózdeıdi.

Baıqaýdyń nátıjesi boıynsha eń úzdik dep tanylǵan jeńimpazdar: «skrıpka» nomınasıasy boıynsha – Aqynger Aılın (10-15 jas) men Bekturova Malıka (16-21 jas), «kıim dızaıny» nomınasıasynda Pernebaeva Gaýhar, dombyra janry boıynsha Shákenbaev Muhamedáli (10-15 jas) men Júleken Jandos (16-21 jas),  «dástúrli halyq áni» atalymy boıynsha Erǵalına Balaýsa, «fotosýret» sheberleriniń arasynda Jakaeva Ofelıa arnaıy maqtaý qaǵazymen, baǵaly syılyqtarmen marapattaldy. Qımylyna kóz ilespes myń buralǵan bıshilerdiń arasyndaǵy básekede bas júldeni «zamanaýı bı» nomınasıasynda «SAAD» bı toby, «halyq bıi» atalymynda ártúrli jas erekshelikterine oraı, «Sarmat» (10-15 jas aralyǵy) pen «Nurbı» (16-21 jas) bı toptary qanjyǵalaryna baılady. Endi atalǵan jeńimpazdardyń barlyǵy qalamyzdyń namysyn - respýblıkalyq Ulttyq delfıı oıyndarynda qorǵaıtyn bolady. Ulttyq delfıı oıyndarynda jeńis tuǵyrynan kóringen jastar halyqaralyq delfıı oıyndarynda elimizdiń atynan óner kórsetedi.