Semeılik traktorshy óz qarajatyna Álıhan Bókeıhanǵa eskertkish qoıdy. Er adam qymbatqa túsken monýment demontajdala ma dep alańdap otyr, - dep habarlaıdy Qamshy aqparattyq agenttigi Tengrinews.kz portalyna silteme jasap.

Traktorshy "Alash" qozǵalysynyń kóshbasshysyna eskertkish qoıý ıdeıasyn tórt jyl boıy oılastyryp júrgen. Alaıda birden kirisip ketýge qarjy máselesi toqtaý salǵan. 2016 jyly Álıhan Bókeıhannyń 150 jyldyǵynda Berikhan Jumadilov sheshim qabyldap, qarajat jınaı bastaıdy. Ol 500 myń teńge jınaıdy. Osy qarajatpen ol jergilikti músinshilerge barǵan. 

"Olar meniń tanystarym. Óz isiniń sheberi. Olar saıası qaıratkerlerdiń qoqystan taýyp alǵan eski bústterin restavrasıalaýǵa kómektesken edi. Tarıhymyz ǵoı dep, jınap júrmin. Ótken jyly táýelsizdigimizdiń 25 jyldyǵyn atap óttik. Bul sol táýelsizdikke birinshi bolyp kúresken Álıhan Bókeıhannyń 150 jyldyǵymen tuspa-tus keldi ǵoı", - deıdi Berikhan Jumadilov. 

Eskertkishti jasaýǵa birneshe aı qajet bolǵan. Jınalǵan barlyq qarajat materıalǵa ǵana jumsalypty. 

"Biz kompozıt materıaldy qoldandyq, onyń quramynda sement belgili bir proporsıada bar, bul quram óte jaqsy qoldanylyp keledi. Tastan da jasaýǵa bolar edi, biraq qymbatqa túser edi. Bul materıalmen de eskertkish kóp jyl turady, qandaı aýa raıy bolsa da myzǵymaıdy. Obrazdy portretine qarap saldyq. Monýmentti tarıhı tulǵanyń boıymen túgeldeı aldyq. Álıhan Bókeıhannyń paraq ustap turǵan beınesin saldyq, partıalastaryna "Alashtyń" Jarlyǵyn oqyp turǵan sáti shyǵar. Eskertkish kvarspen qaptalǵan, ústinen qola jalatylǵan", - deıdi músinshi Bolat Káribaev.

Eskertkish Ertis ózeniniń jaǵasynda ornalasty. Osy mańda onyń avtory - traktorshy Berikhan Jumadilov turady. Er adam jergilikti turǵyndardy shaqyryp, saltanatty túrde ashqysy kelgen, alaıda bul endi bul eńbegi kúıip kete me dep alańdap otyr.  

"Eskertkishti demontajdaý kerek shyǵar. Sóıtsek, ákimdik qarsy eken. Adamdar qaıta-qaıta keldi. Muny zańsyz dep, ıdeıamnan bas tartýymdy surady. Bastapqyda zańdy túrde jerdi tirkep, ruqsat alýym kerek edi. Osyndaı eskertýler jasala bastaǵanda eskertkishti qoıýǵa asyqpadyq. Bireý-mireý satyp ala ma dep te oıladyq. Biraq eskertkish jasalyp qoıdy ǵoı. Sheberhanada turǵanyna úsh aı boldy. Sosyn sheberler ony maǵan berip, men óz kezegimde ony ornatyp qoıdym. Endi alyp tastaý kerek dep jatyr. Ókinishti. Bul aq nıetimizden jasalǵan dúnıe ǵoı. Qanshama eńbek pen qarajat", - deıdi traktorshy. 

Sóıtsek, qalalyq ákimdik Álıhan Bókeıhanǵa eskertkish qoıǵaly jatyr eken. Qarajat ta qarastyrylǵan, konkýrs ta ótip qoıǵan.