Qaraǵandyda búldirshinge qatygezdik kórsetken balabaqsha tárbıeshisi jumystan qýyldy. Mekemeniń dırektory men ádiskerine pedagogtardyń qyzmetine baqylaý júrgizbegeni úshin sógis jarıalandy. Osy derek boıynsha materıaldar quqyq qorǵaý organdaryna berildi, - dep habarlaıdy Qamshy aqparattyq agenttigi Tengrinews.kz portalyna silteme jasap.
Búldirshindi uryp-soǵý oqıǵasy túsirilgen vıdeo Instagram jelisinde Denisa Denski degen blogerdiń paraqshasynda jarıalandy. Vıdeony birneshe saǵattyń ishinde 10 myń adam qaraǵan.
Vıdeonyń kadrlarynan mektep jasyna deıingi balalardyń oryndyqta otyrǵanyn kórýge bolady. Olardyń mańynda tárbıeshi otyr. Pedagog balalardyń qoldaryn tekserip jatady da, bir balany qulaǵynan ustap, tartyp qalady. Balany tizerletip otyrǵyzǵan áıel ony birde tunshyqtyryp, birde shymshyp alady. Sosyn ony qasyndaǵy oryndyqqa otyrǵyzady.
Qalalyq bilim bólimindegiler oqıǵaǵa qatysty pikir bildirdi. Resmı málimet boıynsha, bul vıdeo "Balaqaı" balabaqshasynda túsirilgen. Vıdeodaǵy tárbıeshi jumysyn jalǵastyrýǵa jatpaıtyn adamgershilikke jat qylyq kórsetkeni úshin jumystan shyǵarylǵan. Ol bul mekemede 7 jyldaı ýaqyt jumys istegen.
"Bilim bólimi "Balaqaı" balabaqshasynyń tárbıeshisiniń balalarǵa qatysty qatygezdik kórsetý deregi boıynsha bylaı dep túsinik beredi: ata-analardyń shaǵymynan keıin balabaqsha dırektory ishki qyzmettik tekseris júrgizdi, naqty aıtqanda vıdeobaqylaý kamersyna túsirilgen kadrlar qaraldy, tárbıeshiden túsinikteme alyndy, ata-analar jınalysy ótkizildi. Ókinishke qaraı, bul derek rastaldy. Vıdeomaterıaldar ata-analarǵa berildi. 2017 jyldyń 24 mamyrynda tárbıeshi adamgershilikke jat qylyq jasaǵany úshin 52-baptyń 14-bóligi boıynsha jumystan shyǵaryldy", - dep habarlady vedomstvodaǵylar.
Bilim bólimindegiler ádisker men dırektordyń da jazalanǵanyn habarlady. Olarǵa qatań sógis jarıalanypty. Endi bul ispen quqyq qorǵaý organdary aınalysady. Balabaqsha dırektory osy derek boıynsha materıaldardy polısıaǵa berdi.
