Sh.Aımanov atyndaǵy «Qazaqfılm» kınostýdıasynda senarıi Dýlat Isabekovtiń «Jaýjúrek» pesasy jelisi boıynsha jazylǵan «Balýan Sholaq» (shartty ataý) atty tolyqmetrajdy kórkem fılmniń qorǵalymy ótti dep habarlaıdy Qamshy aqparattyq agenttigi «Qazaqfılm» kınostýdıasynyń Baspasóz qyzmetine silteme jasap.
QR Mádenıet jáne sport mınıstrliginiń tapsyrysy boıynsha túsirgeli otyrǵan bul fılm balýan, ánshi ári kompozıtor Balýan Sholaqtyń ómiri týraly baıandaıdy. Qorǵalym barysynda fılmniń rejıseri Nurgeldi Sadyǵulov «Qazaqfılmniń» Eksperttik keńes múshelerine túsirilim tobyn tanystyryp, túsirilimder bolatyn aımaqtardy atap shyqty.
- Balýan Sholaq sońǵy serilerimizdiń biri. Ol – kompozıtor, balýan, at qulaǵynda oınaǵan sportshy. Fılmde Balýan Sholaqtyń boıynda bar ónerin, eliniń qamy úshin túrli erlikke bara alatyndyǵy men Ǵalıaǵa degen mahabbatyn kórsetkimiz keledi. Túsirilim tobyndaǵy barlyq departamentter túsirilimge tolyqqandy daıyn. – dedi rejıser.
Túsirilimder Akmola oblysy jáne Pavlodar oblysynda ótedi, sondaı-aq keı sahnalar «Qazaqfılmniń» pavılondarynda túsiriletin bolady. Fılmniń qoıýshy sýretshisi Erkin Súleımenov fılmniń negizgi sahnalary bolatyn «Jármenke» jáne «Balýan Sholaqtyń aýyly» dekorasıalaryn Almaty oblysy Jalańash jáne Kegen aýyldarynda turǵyzylǵany týraly aıtyp berdi.
Balýan Sholaqtyń róline rejıser akter Erkebulan Daıyrovty tańdaǵan. Fılmge elimizdiń basqa da tanymal teatr akterlerimen qatar debútant-akterler de túsetin bolady. Túsirilim jumystary 1 maýsymnan Almaty oblysynda bastalady.
Aıta keteıik, «Balýan Sholaq» kartınasy 2017 jyldyń basynan daıyndyq kezeńinde bolatyn. Atalmysh kezeńde basty jáne qosalqy rólderge akterlerdi irikteý, rekvızıtter: at ábzelderin ázirleý, keıipkerler kıimderin tigý, dekorasıalar soǵý jumystary júrgizilgen.
