TMD úkimetteri basshylarynyń keńesinde ınovasıalar salasyndaǵy yntymaqtastyq, kólik qaýipsizdigin qamtamasyz etý, beıbit maqsattarda atom energıasyn paıdalaný, kontrafaktilik ónimderdi shyǵarý men taratýǵa qarsy is-qımyl, zıatkerlik menshikti qorǵaý máseleleri qaralady, dep habarlaıdy Qamshy aqparattyq agenttigi Premer-mınıstrdiń resmı saıtyna silteme jasap.
Eýrazıalyq úkimetaralyq keńes jumysy aıasynda Eýrazıalyq ekonomıkalyq odaqtyń sıfrlyq kún tártibin iske asyrýdyń negizgi baǵyttary, EAEO-nyń ishki naryǵyndaǵy shyǵaryp tastaý men shekteýlerdi joıýǵa baılanysty sharalar jospary, sonymen qatar agroónerkásip kesheni salasyndaǵy birlesken ǵylymı-zertteý jáne tájirıbelik-konstrýktorlyq jumystardy uıymdastyrý tártibi jáne t. b. máseleler talqylandy.
QR Premer-Mınıstri Qazanǵa kelgennen keıin birqatar ınovasıalyq nysandardy aralady, olardyń qatarynda İT-park jáne Innopolıs joǵary tehnologıalar qalasy bar. Sondaı-aq, B. Saǵyntaev qazandyq ınnovatorlardyń jańa ǵylymı ázirlemelerimen tanysty.
Baqytjan Saǵyntaev İT-parkti aralaý barysynda bıznes-ınkýbator jumysymen jáne «Glonass+112» monıtorıń ortalyǵynyń jumysymen tanysty, sonymen qatar oǵan startap jobalardyń prezentasıasy usynyldy. Osydan keıin QR Premer-Mınıstri erekshe ekonomıkalyq aımaqtyń jáne «Innopolıs» joǵary tehnologıalar qalasy ýnıversıtetiniń qyzmetimen tanysty.
Anyqtama:
Tatarstan Respýblıkasynyń Aqparattandyrý jáne baılanys mınıstrligi 30 myń sharshy metr aýmaqta ornalasqan Qazan qalasynyń İT-parkiniń negizin 2009 jyly qalaǵan. Munda 40 startap jobany usynatyn 143 rezıdent bar.
«Innopolıs» EEA jalpy aýdany 311,43 ga-ny quraıtyn eki alańda ornalasqan. Onyń bireýinde ınovasıalyq kompanıalardyń keńseleri men ǵylymı-zertteý, tájirıbelik-konstrýktorlyq ǵımarattar ornalasqan. Ekinshisi rezıdent kompanıalardyń óndiristik qyzmetine arnalǵan.
Eske sala keteıik, buǵan deıin QR Premer-Mınıstri jumys saparymen AQSH-qa baryp, iri İT-kompanıalardyń ókilderimen birqatar kezdesýler ótkizip, jetekshi ınovasıalyq uıymdardyń keńselerin aralaǵan bolatyn.
Sholýshy: Gúlim Jaqan
