Ótken jyly elimizdegi eleýli oqıǵalardyń biri áıgili Keıki batyrdyń basynyń elge jetkizilýi bolatyn. Sol kezdegi Premer-mınıstr Kárim Másimov pen Qazaqstannyń Reseıdegi Tótenshe jáne ókiletti elshisi Marat Tájınniń atsalysýymen otanǵa oralǵan arýaqty erdiń bas súıegi bıyl batyrdyń denesimen birge, ózi týǵan Torǵaı topyraǵyna jerlenedi delingen edi, dep habarlaıdy Qamshy aqparattyq agenttigi Baq.kz basylymna silteme jasap.
Búgin Astanada ótip jatqan «Uly dala» İİ gýmanıtarlyq ǵylymdar forýmynda Keıki batyrdyń bas súıegi arqyly onyń kelbetin qalpyna keltirgen antropolog ǵalym Majarstannyń «Madár-Týran» qorynyń tóraǵasy Bıro Andrash Jolt myrzamen suqbattasýdyń sáti túsken edi.
«Onyń bas súıegi óte jaqsy saqtalǵan. Antropologıalyq bet álpetin qalpyna keltirýde tym qınala qoıǵamyz joq. Bizdiń negizgi jumystarymyz onyń bet-álpetin tabıǵı bet-pishinine negizdep jasadyq» - deıdi Antropolog tarıhshy.
Onyń aıtýyna qaraǵanda áıgili batyrdyń beınesine ózderi jasap shyqqan bet-álpet 90 paıyz uqsaıdy.
«Biz kóbinde 3D tehnologıasyn paıdalanatyndyqtan kelbet batyr babalaryńyzǵa óte uqsas boldy. Jáne bas súıek bizdiń qolymyzǵa bútindeı keldi. Sondyqtan zamanaýı quraldardyń kómegimen biz Keıki batyrdyń shynaıy kelbetin tolyq bere aldyq dep oılaımyn» - deıdi Bıro Andrash.
Andrash Jolttyń aıtýyna qaraǵanda Keıki batyr olardyń qalpyna keltirgen ekinshi qazaq.
«Biz buǵan deıin óte kóp adamnyń beınesin qalpyna keltirdik. Úlken komandamen jumys istep jatyrmyz. Majarstannyń ulttyq antropologıalyq ınstıtýty tek osy jumyspen aınalysady. Qazirgi ýaqytta bizdiń qatarymyzda álemge áıgili sarapshy-antropolog Agnash Kýshter bar. Biz bir quramda buǵan deıin Ábilqaıyr hannyń kelbetin jasadyq. Ózderińiz biletindeı ol múrde Aqtóbedegi «Han molasynda» saqtalǵan. Al odan bólek Býdapeshte ejelgi ǵundardyń, ejelgi túrkilerdiń kelbetin qalpyna keltirdik. Shamamen kóshpendilerge qatysty 50-55 rekonstrýksıa jasadyq» - deıdi antropolog.
Qazaqstannyń tapsyrysymen Ábilhaıyr han men Keıki batyrdy ǵana jasadyq degen antropolog áli de anyqtaýdy, qalpyna keltirýdi kútip jatqan bas súıekter jeterlik deıdi.
«Bizde áli de kóp bas súıekter bar. Ol bir ǵana Qazaqstannan ǵana emes, álemniń kóptegen elderinen kelgen. 40 myńnan astam súıek tabıǵı kelbetin kútip jatyr» - deıdi Andrash Jolt.
Esterińizde bolsa, elge oralǵan Keıki batyrdyń bas súıegin Almatydaǵy Ulttyq mýzeıdiń basshysy Nusan Álimbaı majarlyq ǵalymdardyń qalpyna keltirip jatqandyǵyn aıtqan bolatyn. Sońynan batyrdyń qalpyna keltirilgen beınesi de kórsetilgen edi.
