Qamshy redaksıasyna ózin Oraz Imanqulov dep tanystyrǵan zeınetker tómendegideı hat joldaǵan. Hatynda 66 jastaǵy SHQO turǵyny qarapaıym muǵalim bolyp uzaq jyldar qyzmet etkenin aıtady. Úsh ulyn endi ǵana aıaqtandyryp, kenje qyzyn joǵary oqý ornynan oqytyp jatqan áke eki birdeı kredıt tólep otyrǵanyn aıta kelip, SHQO ákimine suraý tastaıdy.
Qurmetti Danıal Kenjetaıuly!
Endi 20 kúnnen keıin Siz de zeınet jasyna tolasyz. Siz SHQO ákimi ǵana emes Qazaqstannyń 35-inshi qaltalysy Talǵat Ahmetovtiń ákesisiz.
Ápkeńiz Gúlfaz Aýbanova suhbattarynyń birinde 15 degen sannyń otbasylaryńyz úshin óte qadirli ekendigin aıtypty: «Bizdiń Danıal 15 maýsymda dúnıege kelgen, men de shildeniń 15-shi juldyzynda týǵanmyn, ekeýmiz de №15 orta mektepte bilim aldyq».
Sizden eki ese jas, 31-degi balańyz Talǵat Danıaluly 145 mıllıon dollary bar jan. «Forbes» elýlikten oıyp oryn alǵan Talǵatty SHQO Máslıhatynyń depýtaty dep kórsetken. Alaıda ol Máslıhat depýtattary tiziminde joq. Esesine baı balanyń ákesi – Siz salmaqty shendisiz.
Ulyńyz Talǵat Ahmetovtiń de týǵan kúni maýsym aıynda. Ol 21 maýsymda 32 jasqa tolady. 2005-2009 jyldary QazUÝ-da Quqyqtaný mamandyǵyn alǵan eken. Meniń balalarym da Almatyda sol ýnıversıtette ár jyldary oqyp bitirdi.
Qarjy mınıstrligi málimetine qarasaq Talǵat Ahmetov 2007 jyly shildeniń 27-sinde, 22-aq jasynda "KAZVTORCHERMET" dırektorlar keńesine múshe bolǵan. Ashyq málimetke saı oǵan qazirgi tańda AQ «Kazenergokabel» AQ (29,9%), «Pavlodarskıı hlebobýlochnyı kombınat» JSHS, «KAZ InterGroup PV» JSHS, «TASK Holdıń» JSHS, «Temırjolshy» JSHS, «Glorıa-farm» JSHS, «Pavlodarskaıa kondıterskaıa fabrıka» JSHS, sondaı-aq «Aq suńqar NT» JSHS jáne «Engineering Supply Company» JSHS tıesili.
Oǵan qosa Talǵat Ahmetovtiń «Mańǵystaýmunaıgaz» JSHS-ynda da úlesi bar ekeni kórinedi. Osynyń bárine 31 jastaǵy Talǵat Ahmetov Ákesiniń kómegimen qoljetkizdi me? Kúshimen be?
Áke Ahmetov 30 jasynda Ekibastuz qalalyq komıteti KPSS-tiń nusqaýshysy bolyp qana qyzmet atqarǵan. Bala Ahmetov otyzynda aıtýly mıllıoner.
Árıne, Áke Ahmetov – siz ekonomıka ǵylymdarynyń doktorysyz, nusqaýyńyz kádege jarap-aq jatqan bolar. Biraq bıligińizdiń yqpaly joq deýge kelmes. Bizde ol bılik joq.
Qarap kórsek, «MOINAKSKAIa GIDROELEKTROSTANSIA» AQ-ynda Affıılırlengen tulǵalar arasynda 12.06.2010 kúninen bastap, jeke tulǵa ákeli-balaly Danıal jáne Talǵat Ahmetovter kórsetilgen. Osy aksıonerlik qoǵamnyń Dırektorlar keńesinde 2013 jyldyń 26 maýsymynan bastap ulyńyz Talǵat Ahmetov kiripti.
Oblysymyzǵa ákim bolyp otyrǵan Danıal Kenjetaıuly, siz Qorǵanys mınıstri kezinen eldiń esinde jaqsy qalǵan tulǵasyz. Óıtkeni orynbasaryńyz jemqorlyq daýyna shatylǵan. Siz qorǵanys salasyna mınıstr bolyp kelgen alǵashqy áskerı shensiz adam edińiz.
2009 jyly 10 sáýir kúni UQK tergeý departamenti Qorǵanys mınıstriniń orynbasary Qajymurat Maermanovqa qylmystyq kodekstiń 308- baby boıynsha aıyp taqty. Osydan soń kóp ótpeı, 55 jasqa tolǵan týǵan kúnińizdiń erteńinde Siz mınıstrlik qyzmetpen qoshtastyńyz.
Osydan soń bıliktegi jolynyńyzda eki jarym jyldaı bos ýaqyt bar. Bul aqtańdaq ýaqytta nemen aınalysqanyńyz belgisiz. Tek bir jarym jyldan keıin iri kásipker Vladımır Nıdyń jerleý rásiminde boı kórsetipsiz, soǵan qaraǵanda kásipkerler arasynda erekshe syıyńyz bar shyǵar. Bizde ol da joq... 2011 jyly jeltoqsanda Qazaqstan atynan joǵary eýrazıalyq ekonomıkalyq keńestiń múshesi(mınıstr) bolyp taǵaıyndaldyńyz.
Aıtpaqshy, 2013 jyldyń 15 shildesinde QR qorǵanys mınıstri kezińizdegi burynǵy orynbasaryńyz general-leıtenant Maermanov Aqmola garnızonynyń áskerı sotymen 4 jylǵa sottaldy. Áńgimeniń ózegi $82 mln-nan astam búdjet shyǵynynda.
***
Ahmetovtar tegi men tegeýirinine oqyrmanmen birge bajaılaı qarasaq, Danıal Ahmetov men sıaqty muǵalim otbasynda týǵan. Qazaqy dástúr boıynsha úlken aǵasy bala Danıaldy óz tárbıesine alǵan. Keıinnen Danıal Ahmetov ózin eki ana men eki ákeden týǵan balamyn dep ataǵan. Oqý úlgerimi ortasha bolǵan Danıal Ahmetov №10 mektep dırektorynyń orynbasary Gýlıe Maqajanovanyń qyzyna úılengen, sonymen qatar Maqajanovtar men Ahmetovtardyń otbasy bir-birimen dostyq qarym-qatynasta bolǵan.
Danıal Ahmetov Ekibastuz qalasyndaǵy partıalyq-qojalyq salasynda mansabyn bastap kele jatqan kezinde uly men qyzy dúnıege kelgen. 1987 jyly ol qalalyq atqarý komıtetinde qyzmetke ornalasyp, 1992 jyly qala ákimshiliginiń basshysy bop taǵaıyndalady.
1993 jyly Pavlodar qalasynyń ákimi boldy. Alǵash kelgen kezinde Ahmetov óte ashyq jáne lıberaldy basshy retinde kóringen. Sol ýaqyttarda Pavlodar qalasyndaǵy iri kásiporyndardy jekeshelendire bastady. Mysaly, Pavlodar qalasyndaǵy nan óndiretin zaýyt Danıal Ahmetovtyń jekemenshigine ótken, qazirgi tańda bul zaýyt Danıal Ahmetovtyń ulyna tıesili.
1997 jyly Danıal Ahmetov Soltústik Qazaqstan ákimi bolyp saılanady, keıinnen premer-mınıstrdiń orynbasary qyzmetine aýystyrylady. Sońǵy tórt jylda Pavlodar oblysyn Ǵalymjan Jaqıanov basqarǵanyna qaramastan Ahmetovtyń týystary ol jerde jeke kásipterin damytýyn toqtatpady.
Ahmetov Pavlodar oblysyna 2001 jyly qaıta oraldy, ol kezde Ǵalymjan Jaqıanovtyń esimine qatysty barlyq jerlerdi teksere bastaǵan. Búdjette aqsha jetpeı turǵanymen Danıal Ahmetov Ertis jaǵalaýyna qaıta qurýǵa qarjy taýyp, qolǵa aldy.
Ahmetov ekinshi ret kelgen kezinde eki jyl boıy Pavlodarlyq traktor zaýytyn jóndeýge tyrysty. Onyń bazasyna aýylsharýashylyǵyna arnalǵan Tashkenttegi zaýyttan ákelinetin traktorlarmen qamtamasyz etýge ýáde bergen. Alaıda, esh nátıje shyqpady. Kóp uzamaı Danıal Ahmetovty qaıtadan Astanaǵa shaqyrtyp aldy. 2003 jyldyń maýsym aıynan 2007 jyldyń qańtaryna deıin úkimetti basqardy.
Ol ýaqytta Danıaldyń mektepti jańa bitirip, ýnıversıtetke endi túsken 20 jastaǵy uly tabysty bıznes kózin quryp jatqan. Pavlodardaǵy usaq kompanıalardy qospaǵanda Talǵat Ahmetov iri kásiptiń teń ıesi atandy.
Talǵat Ahmetov kásipker Gýrban Mamedovpen birge «Pavlodarlyq Vtorchermet» JSHS-nyń negizin salýshy bolyp tabylady. Sonymen qatar, Talǵat Danıaluly Qazahmys» korporasıasymen birge «Qazenergokabel» AQ-nyń aksıoneri atandy.
Pavlodar oblystyq fılarmonıa ǵımaraty bolǵan úı qazir 62 jastaǵy SHQO ákimi Danıal Ahmetovtyń balalary, ıaǵnı 33 jastaǵy Adelıa men 31 jastaǵy Talǵat Ahmetov basshylyq etetin «TASK holdıńisine» tıesili eken.
Ahmetov premer-mınıstr qyzmetinde bolǵanda onyń ápkesi Gúlfaz Aýbanova memlekettik qyzmette mansabyn qura bastady. Óziniń klınıkasyn basqarýdy senimdi adamǵa tapsyryp, 2005 jyly ol Pavlodar oblysynyń densaýlyq saqtaý basqarmasynyń tóraıymy bolyp taǵaıyndaldy.
2009 jyly Danıal Ahmetovtyń qorǵanys mınıstri qyzmetine túsip qalýy Talǵat Ahmetovtyń kásibine esh yqpalyn tıgizbedi. Kerisinshe, Pavlodardaǵy onyń kóptegen kompanıalary kórkeıe tústi. Qorǵanys mınıstriniń uly «GlorıaFarm» dárihanasy, «Amanat» dúkeni, «Ertis» qonaq úıleri jáne basqa da JSHS arqyly edáýir tabys taba bildi. Birigip bıznes jasady ma? Ol jaǵy belgisiz.
Danıal Ahmetov úlken saıasatta júrgende, 2010 jyly Pavlodar qalasynan onyń urpaqtary negizin qalaǵan «Task Holdıń» quryla bastaıdy. «Task Holdıń» basqarmasy Satpaev kóshesi 83 meken-jaıynda ornalasqan, ol arhıtektorlar «ahmetovtardyń» záýlim saraıy dep atalatyn úıdiń janynda. Holdıńke jergilikti 10 shaqty kompanıa biriktirilgen. Holdıń basshysy – Talǵat Danıaluly Ahmetov bolyp tabylady.
Pavlodarlyq Ádilet basqarmasynyń tirkeý málimetterine sáıkes, Talǵat Ahmetov «Pavlodarlyq nan óndirý kombınaty» men unnan jasalatyn ónimderdi shyǵaratyn jasalatyn eki birdeı seriktestiktiń jalǵyz negizin salýshy bolyp tabylady. Orta eseppen alǵanda, saýda isinde kombınat pavlodarlyq bazardyń 40 paıyzyn quraıdy.
Sonymen qatar, «Pavlodartuz» JSHS, «Pavlodar soda» JSHS, Smart Kid ıaslı-baqshasy men Cinema Star kınoteatry da Talǵat Ahmetovtyń ıeliginde.
Bulardan bólek, Talǵat Ahmetovtyń «Eco Energy», «Amanat», «Ertis servıs treıd», «Aq suńqar NT» kompanıalary elektr energıasy, sý, azyq-túlik ónimderin satý men qurylys jumystarymen aınalysady. Al onyń «Alǵa» JSHS jáne «TreıdKom» JSHS kompanıalary jyljymaıtyn múlikti jalǵa berý arqyly tabys ákeledi.
Minekı, Danıal Ahmetovtyń uly ár salaǵa qyzyǵýshylyq bildiredi. Sol sebepti de, Pavlodar oblysyn «ahmetovtyń aımaǵy» degende úlken Ahmetovtyń mansap jolyndaǵy jeńisterin ǵana emes, kishi Ahmetovtyń ıeligindegi zattardy da oılap qoıǵan jón.
Aıta keter bolsaq, Talǵat Ahmetovtyń ákesi ákim bolyp jumys isteıtin SHQO-da da shaǵyn kásipteri bar. SHQO Zyrán aýdanynyń Ádilet basqarmasynda «KAZ.InterGroup» JSHS tirkelgen. Talǵat Ahmetovtyń basshylyǵyndaǵy bul shaǵyn kompanıa tehnıkalyq keńes berý men ınjenerlik izdeý jumystarymen aınalysady eken.
***
Danıal Kenjetaıuly, mine sizdiń de zeınet jasyńyzǵa sanaýly kúnder qaldy. Balańyz mıllıoner Sizge odan soń jumys isteýdiń de qajettiligi bolmas. Pavlodarda nemerelerińizdi oınatyp, zeınetińizdiń qyzyǵyn pańdana kórip jata berersiz. Aıtpaqshy, Siz Qazaqstandaǵy sanaýly adamǵa buıyrǵan «Qazaqstan Respýblıkasynyń Tuńǵysh Prezıdenti — Elbasy Nursultan Nazarbaev» ordeniniń ıegerisiz. Elbasynyń erekshe yqylasyn kórgen, 20 jylǵa jýyq janynda júrgen ákim Ahmetov sizden suraıtynym: «Ózim sıaqty aınalamda kóptegen adamdar bar. Balalary «qyzylmen» bitirgen. – nege bizdiń balalarymyz mektepti, ýnıversıtetti qansha jaqsy oqysa da mıllıoner bolyp kete almady? Olar túgili ózimiz jarymaı ekiden kredıt tólep júrmiz. Túsine almaıtynym shendi bitkenniń balasy baı. Shendiniń bárinen emes, oblysymyzdyń ákimi bolǵan soń sizge hat jazdym. Paıǵambar jasyna kelip, zeınetke shyǵyp bara jatqanda syryńyzdy aıtarsyz... shynyńyzdy aıtarsyz...
