Elbasy Nursultan Nazaraev «Bolashaq» baǵdarlamasynyń bir bóligin Nazarbaev Ýnıversıtetine oqytýǵa baǵyttaýdy usyndy, dep habarlaıdy Qamshy aqparattyq agenttigi.

 «Bolashaq» baǵdarlamasy qarjysynyń bir bóligin atalǵan ýnıversıtette bilim berýge baǵyttaýdyń ýaqyty jetti. Osynda seriktestik ınovasıanyń pármendi ekojúıesin qalyptastyrý mańyzdy. Álemge ózderiniń ıdeıasyn usynatyn jas ǵalymdar konsýltasıalar, bastapqy kapıtal, zańgerlik qyzmet túrindegi júıeli qoldaýdy alýy tıis», - dedi Memleket basshysy.

Prezıdenttiń paıymynsha, ýnıversıtette basqarýshylar men muǵalimder bilim alýy tıis, sodan keıin osynda jınaqtalǵan úzdik tájirıbeni elimizdegi barsha JOO-laryna engizý kerek.

 «Bul oqý orny Táýelsizdik jyldarynda tabysty júzege asyrylǵan jobalardyń biri. Birtindep osynda bilikti otandyq kadrlarmen jeke ǵylymı mektep qalyptasady. Keshekte túlekter bul oqý ornynda ǵalym atanady jáne olardyń jobalary elimizde jáne shetelde moıyndalady dep senemin»,-dedi Nursultan Nazarbaev.

Aıta keteıik, Elbasy bıyl Nazarbaev Ýnıversıtetin támamdaǵan túlekterdi quttyqtap, doktorantýra baǵdarlamasynyń alǵashqy toǵyz túlegine dıplomdaryn tabystady. Bıyl oqý bitirgen stýdentter sany 737 adam, onyń ishinde bakalavrıat baǵdarlamasy boıynsha 499 túlek, magıstratýra baǵdarlamasy boıynsha 229 stýdent jáne PhD dárejesine ıe bolǵan doktorantýra baǵdarlamasynyń eń alǵashqy 9 túlegi bar. Erekshe úlgidegi dıplomǵa 75 túlek ıe boldy.

Saltanatty rásimge stýdent jastar, olardyń ata-analary, ýnıversıtettiń Qamqorshylyq keńesiniń ókilderi men oqytýshylar qatysty.

Memleket basshysy Nazarbaev Ýnıversıtetiniń túlekterin osy aıtýly kúnmen quttyqtap, olardyń búgingi tabysyna stýdentter men ustazdardyń, ýnıversıtettiń Qamqorshylyq keńesi men barlyq qyzmetkerleriniń birlesken kúsh-jigeriniń arqasynda qol jetkizilip otyrǵanyn atap ótti. 

– Kóktemniń osy shýaqty kúni qýanyshty sátpen – dıplom alǵan jas mamandardyń kásibı eńbek jolyn bastaýymen tuspa-tus kelip otyr. Búgin  Ýnıversıtettiń 737 túlegi oqýdy aıaqtady. Oqý ornynyń tarıhynda biz tuńǵysh ret 9 ǵylym doktoryn daıarlap shyǵardyq, – dedi Qazaqstan Prezıdenti.      

Nursultan Nazarbaev ýnıversıtet dıplomyna ıe bolǵandardyń eńbek naryǵynda básekege qabilettiligi joǵary ekenine nazar aýdardy.

– Aldyńǵy jyldary bul ýnıversıtetti myńnan astam stýdent bitirip shyqty. Olardyń jartysy álemdegi bedeldi oqý oryndarynda bilimin odan ári jalǵastyrdy. Eńbek naryǵyna qosylǵan túlekter ózderiniń básekege qabilettiligin jáne suranysqa saı ekenderin dáleldeı aldy. Olar elimizdiń iri kompanıalarynda, ǵylym, medısına jáne memlekettik qyzmet salasynda jumys istep jatyr, – dedi Memleket basshysy.    

Qazaqstan Prezıdenti bul jetistikterge merıtokratıa men básekelestik negizindegi irikteý júıesin damytýǵa baǵyttalǵan tıimdi bilim berý modeliniń arqasynda qol jetkizilgenin aıtty.

Nursultan Nazarbaev bilim mekemelerine qabyldaý úshin ótkiziletin irikteýdiń ádildik pen ashyqtyq qaǵıdattaryna negizdeletinin atap ótti.   

– Ýnıversıtet pen zıatkerlik mektepterdiń esigi daryndy, eńbekqor jáne bilimge qushtar jastar úshin árqashan ashyq. Oqý ornyna túsý, bilim salasynda jetistikke jetý jolynda ádilettilik saqtalady jáne ol eshqandaı sýbektıvti faktorlarǵa táýeldi emes, – dedi Memleket basshysy.      

Qazaqstan Prezıdenti stýdentter sanynyń kóbeıýine baılanysty  keleshekte oqý ornynyń ınstıtýsıonaldyq áleýetin arttyrý qajettigine nazar aýdardy.

– Bilim alyp jatqan stýdentter sany búginde 4 myńǵa jetti, bolashaqta olardyń sany eki ese artady. Búgin munda álemniń 55 elinen kelgen ǵalymdar jumys isteıdi. Olar dáris oqyp qana qoımaı, ǵylymı  jumystarmen de belsene aınalysýda. Bilim berý men zertteý isi aǵylshyn tilinde júrgiziledi. Qazirdiń ózinde myńnan astam zertteý eńbegi jarıalandy. Olardyń arasynda eń kóp silteme jasalatyn álemdik ǵylymı basylymdarda jaryq kórgenderi bar, – dedi Nursultan Nazarbaev.          

Memleket basshysy bilim berý naryǵynda jahandyq básekeniń kúsheıip kele jatqanyn aıtyp, taıaý jáne alys shetelderden stýdentter men jas ǵalymdardy kóbirek tartý qajettigin atap ótti.

Qazaqstan Prezıdenti zertteýler sapasyn arttyrýǵa jáne jastarǵa ǵylymı baılanystaryn keńeıtýge múmkindik beretin tıisti granttar bólýdiń mańyzdylyǵyna nazar aýdardy.

Sonymen qatar, Nursultan Nazarbaev ýnıversıtettiń halyqaralyq baılanystar aıasyn keńeıtý jáne ony jahandyq akademıalyq ortamen ıntegrasıalaý týraly aıtty.

– Álemniń júzden astam bilim berý jáne ǵylymı ortalyqtarymen seriktestik ornatyldy. Nazarbaev Ýnıversıteti Azıa ýnıversıtetteri alánsynyń teń quryltaıshysy boldy. Alánsqa Qytaıdyń, Gonkongtyń, Úndistannyń, Indonezıanyń, Japonıanyń, Ońtústik Koreıanyń, Malaızıanyń, Sıngapýrdiń jáne taǵy basqa elderdiń jetekshi joǵary oqý oryndary kirgen. Sonymen birge, halyqaralyq baılanystar aıasyn odan ári keńeıtip, áriptesterdiń ozyq tájirıbesin úırene otyryp, ózińniń biregeıligińdi de saqtaý kerek, – dedi Memleket basshysy.       

Sondaı-aq, Qazaqstan Prezıdenti osy ýnıversıtet tájirıbesin elimizdegi búkil joǵary bilim berý júıesi kóleminde qoldanýdyń mańyzdylyǵyn atap ótti.

– Otandyq joǵary oqý oryndarynyń basqarýshylary men oqytýshylary osynda bilimin jetildirip, alǵan úzdik tájirıbe men meńgergen mashyǵyn óz oqý oryndaryna engizýleri kerek. Nazarbaev Ýnıversıteti – jańa jahandyq jaǵdaıdaǵy syn-qaterlerge degen bizdiń strategıalyq jaýabymyz. «Bolashaq» baǵdarlamasyna bólinetin qarjynyń bir bóligin osy Ýnıversıtette oqytýǵa jumsaıtyn kez keldi. Naryqqa óz ıdeıalary men tehnologıalaryn usynatyn jas ǵalymdarǵa aqyl-keńes, bastapqy kapıtal, keńse, marketıńtik jáne zańgerlik kómek túrindegi keshendi qoldaý jasalýǵa tıis, – dedi Nursultan Nazarbaev.  

Memleket basshysy ýnıversıtettiń birqatar ǵylymı jobalary men startaptaryn iske asyrýyna kómektesý qajettigin atap ótti.

Qazaqstan Prezıdenti óziniń «Bolashaqqa baǵdar: rýhanı jańǵyrý» atty maqalasynda aıtylǵan tabysqa jetýdiń basty talaptary týraly oılaryn túlekterdiń esine saldy. 

– Qazirgi zaman – erterekte oqyǵan-toqyǵanyn kóńiline toq sanamaıtyn, jańa bilim alýǵa qabiletti, jańa ózgeristerge beıim, zertteýshiler men ınvestorlardyń tilinde sóıleı alatyn adamnyń zamany. Mine, osyndaı jannyń upaıy túgel bolady. Men ómirlik tájirıbeme súıenip,  azamattarymyzdyń jańa dáýirde naqty qasıetterge ıe bolýy qajet ekendigine kózimdi jetkizdim. Eń aldymen, básekege qabiletti bolý qajet. Bul tek ekonomıkamyzǵa ǵana emes, árbir naqty adamǵa qatysty. Pragmatık ári patrıot bolý kerek. Bilimdi dáripteýden qashpaý kerek. Adam neǵurlym kóp bilgen saıyn onyń múmkindigi de soǵurlym arta túsedi. Nazarbaev Ýnıversıtetiniń stýdentteri muny bárinen de jaqsy túsinedi dep senemin, – dedi Memleket basshysy.           

Nursultan Nazarbaev qoǵamnyń evolúsıalyq damý baǵytyn saqtap, uǵymtal bolý, álem tilderin bilý jáne jahanda bolyp jatqan jańa úrdisterdi túsine bilý tulǵa retinde jetile túsý úshin asa mańyzdy ekenin atap ótti. 

– Sizderdi táýelsiz Qazaqstannyń damýy men órkendeýine laıyqty úles qosady dep senemin. Qol jetkizgen jetistikterińiz ózderińiz bilim alǵan ýnıversıtettiń de bedeli men tanymaldyǵynyń artýyna septigin tıgizedi. Ol úshin sizder erinbeı eńbek etip, alǵa qoıǵan maqsat jolynda tabandy túrde ilgerileı berýlerińiz kerek, – dedi Qazaqstan Prezıdenti.