QR Premer-Mınıstri B. Saǵyntaev «Zeınetaqymen qamsyzdandyrý týraly» QR zańyna sáıkes, BJZQ aksıonerlik qoǵamynyń menshik ıesi Úkimet bolyp tabylatynyn, jáne memlekettiń alýshylarǵa mindetti zeınetaqy jarnalaryn saqtaýǵa kepildik beretinin aıtyp ótti, dep habarlaıdy Qamshy aqparattyq agenttigi Premer-mınıstrdiń resmı saıtyna silteme jasap. 

Osyǵan oraı, Úkimet Qazaqstan azamattarynyń zeınetaqy aktıvterin saqtaýǵa tikeleı múddeli jáne osy máselege baılanysty arnaıy ókilderdi taǵaıyndady.

«Men óz tarapymnan ázerbaıjandyq áriptesim, Premer-Mınıstrmen pikirlestim, ol banktiń barlyq kredıtorlaryna qaryzdy qaıtarý úderisinde jan-jaqty qoldaý kórsetetinin aıtty», - dedi B. Saǵyntaev.

QR qarjy mınıstri Baqyt Sultanov 2014 jyldyń qazan aıynda BJZQ aktıvteriniń portfeline aınalym merzimi 10 jyl jáne mólsherlemesi 8,25% bolatyn 250 mln dollar kólemindegi Ázerbaıjan Halyqaralyq bankiniń qaryzdyq baǵaly qaǵazdary alynǵanyn aıtty. 2014 jyldan bastap búginge deıin BJZQ ÁHB-inen syıaqy retinde 15 mlrd teńge kólemindegi qarajat aldy, bul ınvestısıalanǵan somanyń úshten bir bóligine jýyq.

«Osy másele boıynsha ókiletti Ázerbaıjannyń qarjy mınıstri Ázerbaıjannyń ulttyq valútasynyń devalvasıasyna baılanysty Halyqaralyq bank kredıtorlar aldyndaǵy óz mindettemelerin oryndamaǵanyn túsindirip ótti. Bul máseleni Ázerbaıjan Úkimeti erekshe baqylaýyna aldy jáne áriptesterimizdiń aıtýynsha, Ázerbaıjan banktiń barlyq kredıtorlarynyń múddelerin qamtý úshin bar múmkindigin salady», - dedi B. Sultanov.

Sholýshy: Gúlim Jaqan