Ońtústik Qazaqstan oblysynda balalary eseıip ketken erli-zaıypty taǵy 5 bala asyrap almaqshy. Arys aýdanynda turatyn Dıqanbaevtar áýletiniń otaǵasy qazir balalardyń qujattaryn rásimdep jatyr. Olar osylaısha elimizdegi jetimder sanynyń azaıýyna yqpal jasamaq, dep habarlaıdy Qamshy aqparattyq agenttigi QazAqparatqa silteme jasap.

Muhtarbek pen Qarlyǵash Dıqanbaevtardyń úsh qyz, bir uly bar. Qyzdaryn qutty oryndaryna qondyryp, uly er jetkennen keıin olar 5 birdeı balany baýyryna basýǵa nıettengen. Sóıtip bolashaq perzentterin Arys aýdanyndaǵy balalar úıinen tapqan. Óıtkeni Qarlyǵash Dıqanbaeva 15 jyldan beri osy balalar úıinde tárbıeshi bolyp jumys isteıdi. Sondyqtan balalarmen til tabysýda qıyndyq bolmaıdy dep senedi. Bir qyzyǵy, balalardyń úsheýi aǵaıyndy, orys ultynan. Dini men tili bólek bolǵanyna qaramastan asyrap alýshy otbasy bul balalarǵa óz tegin bermekshi.

«Balalarymnyń tegi Muratbekuly bolady. Mysaly, Muratbekuly Vasılıı degendeı. Eki úlkeni qyz bolsa, qalǵandary ul balalar. Olarmen tanysyp, biraz ýaqyttan berý úıimizge ákelip júrmiz. Áıelimiz ekeýmiz de úırenisip qaldyq. Endigi kezekte olardy baǵyp-qaǵyp, úmitin aqtaımyn dep senemin»,-deıdi otaǵasy Muhtarbek Dıqanbaev.

Qazir erli-zaıyptylar qujattardy rásimdep júr. Óıtkeni balǵyndar da bolashaq óz úılerine kóship kelýge asyǵýda. Sebebi, jańa týystaryn tapqan Gabrıel, Vladımır, Vasılııdiń jáne Dıana men Aısulý óz otbasy bolǵanyn armandaıdy.

«Maǵan anashym, qashan qujatymyz daıyn bolady dep asyǵyp júr balalarym. Biz de sendermen birge bolýǵa asyǵyp júrmiz dep aıttym. Onyń ústine jańa jıhazdarǵa tapsyrys berip qoıdym. Balalardyń jaǵdaıyn jasasam deımin. Otbasy degen ne, onyń qundylyqtary degen uǵymdardy balalarymnyń boıyna sińirsem deımin. Erteń óskende ata-anam bar dep kelip turady», - deıdi Qarlyǵash Dıqanbaeva.

Osylaısha  Arys aýdanyndaǵy balar úıiniń tárbıelenýshiler sany 5 balaǵa kemimek. Dese de munda áli  73 bala bar.  Aıta keterligi,  bul mekemeniń basqa balalar úıine qaraǵanda ózgeshelikteri de bar. Olardyń árqaısysy óz otbasy dep bólip qoıǵan otbasylyq ıkemdilikte tárbıelenedi. Iaǵnı ár on bala bir shańyraq bolyp, tárbıeshisimen birge ómir súredi. Mundaǵy mamandar bolsa  balalardy asyrap alýǵa nıet bilgender sany búginde kóbeıip keledi dep otyr.  Ondaı jandarǵa  memleket tarapynan qarjylyq qoldaý da kórsetiledi eken.