Qazaqstan Prezıdentine rásim barysynda Koreıa Respýblıkasynyń Tótenshe jáne ókiletti elshisi Kım De-Sık, Serbıa Respýblıkasynyń Tótenshe jáne ókiletti elshisi Vladan Matıch, Indonezıa Respýblıkasynyń Tótenshe jáne ókiletti elshisi Rahmat Pramono, sondaı-aq Rýmynıanyń Tótenshe jáne ókiletti elshisi Chezar-Manole Armáný senim gramotasyn tapsyrdy, dep habarlaıdy Qamshy aqparattyq agenttiginiń tilshisi.

Memleket basshysy elshilerdi Qazaqstandaǵy dıplomatıalyq qyzmetiniń bastalýymen quttyqtap, olardyń jumysy memleketaralyq yntymaqtastyqty nyǵaıtýǵa baǵyttalatynyna senim bildirdi.

Nursultan Nazarbaev elshilerdiń Qazaqstandaǵy dıplomatıalyq mısıasy memleketimiz úshin jańa tarıhı kezeńde bastalǵaly turǵanyn aıtty.

– Táýelsizdiginiń 25 jyldyǵyn atap ótken Qazaqstan óz órkendeýiniń úshinshi kezeńine qadam basty. Sonymen qatar, elimizde ındýstrıalandyrý baǵdarlamasy qarqyndy júzege asyrylýda. Biz básekege qabiletti jastar tárbıeleý maqsatymen rýhanı jańǵyrýdy qolǵa aldyq. Osy atalǵan bastamalarymyzdyń túpki maqsaty – álemdegi eń damyǵan 30 eldiń qataryna qosylý, – dedi Memleket basshysy.

Qazaqstan Prezıdenti elimizdiń óńirdegi turaqtylyq pen qaýipsizdikti saqtaýǵa qatysty bastamalaryna, sondaı-aq odan ári damý men ózara yntymaqtastyqty qamtamasyz etý baǵytynda júzege asyrǵan sharalaryna toqtalyp, Qazaqstannyń syrtqy saıasattaǵy qyzmetiniń nátıjelerine nazar aýdardy.

– Qazaqstan BUU Qaýipsizdik Keńesiniń turaqty emes múshesi retinde óz mindetterin tolyq oryndaýda. Elimiz dúnıe júzindegi túıtkilder men shıelenisterdi sheshýge belsene atsalysyp keledi. Solardyń biri – Sırıadaǵy qaqtyǵys. Astanada Sırıa úkimeti men qarýly opozısıa ókilderi alǵash ret bir ústel basynda kezdesti. Sanaýly kúnderden soń Astanada «EKSPO-2017» halyqaralyq kórmesiniń ashylý rásimi ótedi. Oǵan álemniń 100-den astam ókili qatysady. Sizder «EKSPO-2017» kórmesin ótkizýge belsene atsalysady dep senemin, – dedi Nursultan Nazarbaev.

Sonymen qatar, Memleket basshysy qolaıly ınvestısıalyq ahýaldy qamtamasyz etý, elimizdiń tranzıttik-kóliktik áleýetin tıimdi paıdalaný jumysynyń nátıjesine toqtalyp, sheteldik bıznes ókilderiniń Qazaqstandaǵy jobalardy iske asyrýǵa qatysýynyń mańyzdylyǵyn atap ótti.

Qazaqstan Prezıdenti elimiz óz egemendiginiń alǵashqy kezeńinen bastap memleketaralyq deńgeıde syndarly dıalog pen yntymaqtastyqqa negizdelgen saıasat júrgizip kele jatqanyn aıtty.

– Koreıa Respýblıkasy – Qazaqstannyń Azıadaǵy negizgi seriktesiniń biri. Men Seýlge byltyrǵy qarashadaǵy memlekettik saparymnyń nátıjesin joǵary baǵalaımyn. Qazaqstan ekonomıkasy úshin Ońtústik Koreıa óńirdegi iri ınvestordyń biri bolyp sanalady. Qazaqstan dıplomatıasynyń kúsh-jigeri Soltústik Koreıaǵa qatysty máseleni tek beıbit kelissózder arqyly sheshýge baǵyttalǵan. Men osy óńirde beıbitshilik ornaıtynyna senemin. Ekijaqty yntymaqtastyqty barlyq salada odan ári damytý joldaryn talqylaý úshin Prezıdent Mýn Chje Inniń Qazaqstanǵa saparmen kelýin kútemiz, – dedi Nursultan Nazarbaev.

Memleket basshysy Qazaqstan men Indonezıa arasyndaǵy qarym-qatynastyń damýynda ilgerileýshilik bar ekenin atap ótip, saıası jáne halyqaralyq máselelerge qatysty Astana men Jakartanyń kózqarastary uqsas ekenine nazar aýdardy.

Qazaqstan Prezıdenti elderimiz arasyndaǵy saýda-ekonomıkalyq baılanystardy damytýdyń áleýeti joǵary ekenine toqtalyp, bul baǵyttaǵy úkimetaralyq jumysty jolǵa qoıý qajettigin aıtty.

Nursultan Nazarbaev Serbıa Respýblıkasymen qarym-qatynasymyz júıeli ári dáıekti túrde damyp kele jatqanyn atap ótti. 

– Elderimizdiń baılanysyn nyǵaıtýǵa sońǵy eki jyldaǵy joǵary deńgeıde ótken saparlar tyń serpin berdi. Ekijaqty saıası dıalog pen saýda-ekonomıkalyq yntymaqtastyqty damytýdyń áleýeti zor. Sondaı-aq, «Astana-EKSPO-2017» kórmesiniń ashylý saltanatyna Serbıanyń jańa Prezıdenti A.Výchıchtiń qatysatynyn atap ótkim keledi, – dedi Nursultan Nazarbaev.

Memleket basshysy Qazaqstannyń Rýmynıamen ózara tıimdi yntymaqtastyqty odan ári damytýǵa basa mán beretinin aıtty.

Qazaqstan Prezıdenti Rýmyn ekonomıkasynyń energetıka salasyna elimiz salǵan ınvestısıa memleketterimiz arasyndaǵy kooperasıanyń aıshyqty aıǵaǵy ekenin atap ótti. Nursultan Nazarbaev Astana men Býharest arasyndaǵy yntymaqtastyqty seriktestiktiń joǵary deńgeıine kóterýge múddeli ekenimizdi jetkizdi.

Sońynda Memleket basshysy dıplomattardy Qazaqstandaǵy mısıasynyń bastalýymen taǵy da quttyqtap, yntymaqtastyqty nyǵaıtý jolyndaǵy isterine sáttilik,  jumystaryna tabys tiledi.