Tótennen týǵan náste emes, oraıy kelgen uly dúbir toı. Qazaq Handyǵynyń mereıtoıy.

Aıtary joq, Prezıdenttiń «Qazaq handyǵynyń 550-jyldyǵyn merekeleý týraly» ýáli sózi bárimizdiń kóńilimizden shyqty. Biraq, osy mańyzdy máseleni talqylaý kezinde, ózimiz de ańǵarmaı, kereǵar oı, pikir qaıshylyqtaryn jiberip alyp jatyrmyz.  Eki-úsh kúnnen beri aqparat quraldarynda, áleýmettik jelide barlyǵymyz jabylyp, muny «Qazaq memleketine – 550 jyl» dep jarnamalaı bastadyq. Anyǵynda, «Qazaq memleketine – 550 jyl» emes, «Qazaq handyǵyna – 550 jyl» bolsa kerek.  Árıne, qazirgi jaǵdaıda Qazaq handyǵynyń 550-jyldyǵyn maǵynaly, mańyzdy is-áreketpen atap ótip alsaq ta – úlken olja. Biraq, halqymyz úshin de, keleshek jas urpaq úshin de, ishki-syrtqy dos-dushpan úshin de bul toıdyń «aty-jónin, mán-maǵynasyn» jiliktep, anyqtap, ashyp bergen durys.  Al, qazaqtyń jerindegi órkenıetterdiń, memleketterdiń, ult-ulystardyń tarıhy, osy bir jazıra daladaı, myńdaǵan jyldardyń óne boıyna sozylyp jatyr. Ol órkenıetter men memleketterdiń mereıtoıyn da sát-sátimen atap ótermiz. 

Sondyqtan, saq bolaıyq. Olaı bolmasa, memlekettigimizdiń tarıhyn «bes-aq ǵasyrǵa syıǵyzyp jiberip», taǵy da taǵdyrdyń tálkegine, tarıhtyń tuzaǵyna ózimiz baryp túserimiz kádik.