EHRO kórmesinde Vengrıa eliniń ulttyq kúni toılanyp jatyr. Osyǵan oraı ulttyq kún sahnasynda saltanatty shara uıymdastyryldy. Bul týraly Qamshy.kz aqparat agenttigi khabar.kz-ke silteme jasap habarlaıdy.

Dástúrli kıim kıgen majarlyq ónerpazdar qypshaqtardyń turmys-saltyn kórsetip, dástúrli mýzykasyn oryndady. Majar halqy ejelden ózderin qypshaqtan taraǵan urpaq ekenderin aıtyp keledi. Sondyqtan bolar majar men qazaq halyqtarynyń salt-dástúri, ádet-ǵurpy óte uqsas. Sondaı-aq, 3 kún boıy Vengrıa pavılonynda qypshaq kúnderin toılaıdy.  412 sharshy metr aýmaqty alyp jatqan pavılonda tabıǵı resýrstarǵa basymdyq berilgen. Iaǵnı kún, jel jáne sýdan qýat alatyn tyń jańalyqtaryn beınerolıkter arqyly kórsetip beredi. Olar qarapaıym aǵash japyraqtaryn sıntezdeý arqyly qýat alýǵa bolatyndyǵyn dáleldedi. Sonymen qatar pavılonnyń qaq ortasynda «Ómir aǵashy» dep atalatyn úlken báıterek ornatylǵan. 

Aıta ketý kerek, búginde Býdapesht kóshelerinde benzınmen emes, toqpen júretin avtobýstar júıtkıdi.

Djordj Kossa, ekologıalyq kólik shyǵaratyn kompanıa basshysy:

– Biz elektr energıasy arqyly júretin avtobýstardy shyǵara bastadyq. Bul – qorshaǵan ortany lastamaıtyn ekologıalyq taza kólik. «Jasyl» tehnologıanyń damýyna osylaısha óz úlesimizdi qospaqpyz. Al EHRO-2017 kórmesi arqyly jańa jobalarmen tanysýǵa múmkindik týdy.