Tájik mıgranttary Reseıdiń Qaýipsizdik jónindegi federaldy qyzmeti (FSB) tarapynan "kúdikti jerlesteri" týraly aqparat berip otyrýdy talap etetin jaǵdaılar kóbeıip ketti dep habarlaıdy. Ásirese 14 tamyzda terakt jasamaq boldy dep bir top mıgrant ustalǵannan keıin, FSB "tyńshylyqqa" adamdardy tartýdy kúsheıtken dep habarlaıdy Qamshy.kz aqparat agenttigi Sentralasian.org saıtyna silteme jasap.
Eńbek mıgranttarynyń birlestigi ókilderiniń sózderinshe, Reseıdiń arnaıy qyzmeti mıgranttarmen negizi jataqhanalarda jumys isteıdi. Biraq sońǵy ýaqytta mıgranttardy kóshelerde ustap, arnaıy qyzmetke jumys isteýge úgit júrgize bastaǵan.
Máselen Shırındjon Kalandarovty metroda azamattyq kıimdegi eki adam toqtatqan. Ózderin FSB ókilderimiz dep tanystyrǵan olar "kúdikti jerlesteri" týraly aqparat berip otyrýdy suraǵan. Ol úshin syıaqy alasyń degen. "Men olarmen jumys isteýden bas tartqanymda, ómirime qaýip tónetinin aıtyp, oılanýǵa bir apta berdi", – deıdi Shırındjon.
"Etmos" uıymynyń jetekshisi Karımdjon Órov Máskeýde FSB ókilderi mıgranttardy elderine qaıtaryp jiberemiz dep jıi qorqytatynyn aıtady. «Bir táýliktiń ishinde Tájikstannan kelgen 8 mıgrant maǵan FSB ókilderiniń ózderin bopsalaǵanyn aıtty», – deıdi Órov.
