Jýyrda ǵana Alashuldarynyń «Paı-paı-paı» atty ánine túsirilgen beınebaıan jaryqqa shyqqan bolatyn. Klıptyń birneshe sekýndtyq tızeri áleýmettik jelilerde taralǵan sátten-aq, Alashuly toby men jańa týyndylary talqyǵa túsip, qoǵamda eki túrli pikir qalyptastyrǵan bolatyn. Atap aıtar bolsaq, elimizde beleń alyp jatqan zamanaýı stılderge qatysty ulttyq múddeniń joıylyp bara jatqandyǵynan kórinis berip, batys elderinen elimizge sińgen mádenıettiń jastar arasynda keńinen taralyp, ultymyzǵa tıgizip jatqan keri áserlerin óner arqyly ashyp kórsetken. Jeli qoldanýshylary "Alashuldarynyń" bul beınebaıanyn tikeleı "91" tobyna baǵyttalǵan dep, Q-pop fanattary klıpke qatysty ózindik kózqarastaryn bildirip, eki topty ózara salystyra ketti. Qysqa ǵana merzimde halyq arasyna keńinen taralyp ketken atalmysh beınebaıan, joǵaryda atap ótkenimizdeı, qoǵamnyń pikirin ekige jaryp, eki túrli pozısıany qalyptastyrdy. 

Biri – qazaq er-jigitteriniń bul is-áreketterin qup kórip, alǵystaryn bildirse, ózderin Q-pop stıliniń ónerpazdary jáne fanattary retinde sanaıtyndar atalmysh topty 91 tobymen salystyra túsip, túrlishe negatıvti pikirler aıtqan bolatyn. Ónerpazdyń ómiri men is-áreketteri qashan da eldiń nazarynda, halyqtyń talqysynda júredi. Qoǵamda týǵan daýǵa qatysty beınebaıannyń qandaı maqsatta túsirilgenine baılanysty Qamshy.kz aqparat agenttiginiń tilshisi eki jaqty – «Alashuly» toby men «91» tobymen suhbattasyp, pikirlerin bilýge tyrysty.

Tolyq nusqasy shyqpaı jatyp biraz eldiń synyna ilikken Alashuldary atalmysh beınebaıanǵa qatysty bylaı deıdi:

«Jalpy beınebaıan jaıynda aıtar bolsaq, bul klıp – bizdiń azamattyq pozısıamyz, Qazaqstan Respýblıkasynyń azamaty retinde bolashaqqa degen alańdaýshylyǵymyz, azamattyq kózqarasymyz. Kópten beri oıymyzdy mazalap júrgen suraqtar. Osy turǵyda ózimizdiń azamattyq pozısıamyzdy bildirip, osyndaı dúnıeni jasap shyǵarǵymyz keldi. Al kez kelgen shyǵarmashylyq proses senarıden bastalady. Klıptiń rejıseri – Anvar Madjanov jáne de Almas degen jigit, barlyǵymyz oıymyzdy ortaǵa salyp, aqyldastyq.

Qazaq eliniń eldigin, ulttyq múddesin qurtatyn mundaı dúnıeler – elimizge syrttan enip jatqan kúsh. Osy prosesti qalaı kórsetemiz degen suraq týyndady bizde? Iaǵnı, qalada, aýlada qarapaıym qazaqtyń qyz-jigitteri oınap, kóńil kóterip jatqan jerinen erekshe stılde kıingen bir adam kelip, barlyǵyn óziniń sońynan ertip alyp ketedi. Sol erekshe kıimdi adam arqyly biz syrttan kelip jatqan mádenıetti kórsetkimiz keldi. Áleýmettik jelide barlyǵy «qyzyl kıimdi» adamdy talqyǵa salyp, árkimge teńep jatyr. Alaıda bul adam belgili bir toptyń jetekshisin nemese prodúserin kórsetip, mazaq qylý emes. Bul – shyǵarmashylyq podhod, alegorıalyq keıipker dep atasa da bolady. Klıpte bizge qarsy k-poperlar, gottar, frıkılar sekildi mádenıettiń adamdary bolady. Elimizde qatty beleń alyp jatqan basqasha uǵymdaǵy mádenıetter óte kóp jáne de olarǵa qosylýshy toptar da kóbeıip kele jatyr.

Qazaq halqy – óte elikteýshi halyqpyz. Iá, shetten úırený kerek, zamannyń aǵymymen birge damý kerek. Alaıda bizdiń ultymyzdyń da ózge halyqtardan artyqshylyǵymyz óte kóp. Qazaq ultynyń mádenıet, tektilik, qan tazalyǵy degen sekildi nárselerdi sheteldikter bizden úırengisi keledi. Biraq qolda barda altynnyń qadirin bilmeı jatatyn tustarymyz bar. Kerisinshe olardyń mádenıetin ózimizdiń elimizge alyp kelip, qoǵamdy ýlap jatyrmyz. Osy syndy birqatar máselelerge baılanysty Alashtyń uldary retinde, ózimizdiń alańdaýshylyǵymyzdy bildirip, ózindik kózqarasymyzdy bildirdik».

– Paı-paı-paı» ániniń klıpine qatysty áleýmettik jeli qoldanýshylary túrlishe pikir aıtýda. Buǵan ne deısizder?

– Atalmysh týyndymyzǵa qatysty áleýmettik jelide kóptegen jaǵymsyz pikirler jazylyp jatyr. Eń soraqysy, bul pikirlerdi ózimizdiń baýyrlarymyz, qazaqtyń qara domalaq balalary bildirýde. Árıne qoldan keler shama joq. Bálkim, basqasha túsinip qalǵan bolý kerek.

Kásibı kózqarasqa keler bolsaq, bul beınebaıanǵa qatysty kóptegen klıpter, kınolar túsirip júrgen rejıserlar, kásibı mamandar ózderiniń oń baǵasyn berip, «Óte jaqsy» dep baǵalaýda. Sonymen qatar, shetelden, ásirese Túrkıa, Qytaı elderinen ózderiniń rızashylyqtaryn bildirip, sapasyna «óte jaqsy» dep baǵalaryn berip jatyr. Bul tek Qazaqstanda ǵana emes, Túrkıada da beleń alyp jatqan másele eken. Sol eldegi qandastarymyz kóptegen jaǵymdy, jaqsy pikirler aıtýda.

Bul máseleni doǵara almaspyz, bálkim, alaıda bizdiń týyndymyz ózimiz sekildi oılaıtyn, elimizdiń bolashaǵyna alańdaıtyn adamdardyń múddesi úshin arnalǵan dúnıe dep qabyldaǵan jón.

– 91 tobymen salystyryp, birshama pikirler aıtyldy. Osyǵan qatysty ne aıta alasyz?

– 91 tobyna qatysty kóp aıtylyp jatyr, ol balalardyń eńbekqorlyǵyna, shyǵarmashylyqtaryna eshnárse demeımin. Jaqsy ánderi bar. Ónerdegi inilerimiz bolyp keledi, sol sebepti de olardyń betterinen alyp, aıaqtarynan shalý degen eshqandaı da oı joq.

Al áleýmettik jelidegi jazylyp jatqan pikirlerge qatysty eshnárse deı almaımyn. Árkim ne jazsa da, ózi biledi. Eń bastysy, biz kóp sóılegenniń ornyna is-áreketimizben kórsetýdi jón kórdik.

Alashuldarynyń pikirleri osylaı boldy. Al, atalmysh beınebaıanǵa qatysty «91» toby ne deıdi?

Top músheleriniń ózderimen baılanysqa túsý múmkin bolmaǵanmen, biz olardyń prodúserleri Erbolat Bedelhanǵa qońyraý shalyp, Alashuldarynyń bul týyndysyna aıtar pikirin bilmek boldyq. Alaıda atalmysh beınebaıanǵa qatysty qandaı da bir pikir bildirýge úzildi-kesildi qarsy bolǵan Erbolat Bedelhan: «Men buǵan qatysty eshqandaı da pikir bildirmeımin, bul klıpti kórgen de joqpyn. Olarǵa eshnárse dep jaýap bermeımin. Alashulyna tek baqyt tileımin», – degennen basqa eshnárse aıtpady.

Jastar arasynda qyzý talqyǵa túsken beınebaıandy nazarlaryńyzǵa usyna otyryp, óz pikirińizdi bildirýińizdi suraımyz.

Nazerke Labıhan