2017 jylǵy 29 tamyzda Qazaqstan Respýblıkasy Ulttyq mýzeıiniń kishi májilis zalynda Konstıtýsıa kúnine oraılastyrylǵan «Ata Zań – elimizdiń turaqtylyǵynyń negizi» atty dóńgelek ústel ótti.

Sharaǵa elimizge belgili zańgerler, tarıhshylar men ózge de zıaly qaýym ókilderi jáne mýzeı qyzmetkerleri qatysty. Jıynda sóz alǵan QR Ardagerler uıymynyń ortalyq keńesi tóraǵasynyń birinshi orynbasary Ozǵanbaev Ómirzaq: «Biz Konstıtýsıamyzdy zaman talabyna saı shynyqtyrýǵa kúsh saldyq. Biraq ol ózgertýlerdiń negizinde bastapqy Konstıtýsıamyz turdy. Sebebi barlyq zańnyń negizi – Ata zań bolyp tabylady. Elimizdegi qabyldanatyn kez kelgen quqyqtyq qujat Konstıtýsıamyzdyń negizinde bolady. Eger Konstıtýsıaǵa qarsy qandaı da bir tustary bolatyn bolsa, ondaı zańnyń kúshi joq dep eseptelinedi», – dep Konstıtýsıanyń mańyzdylyǵyna toqtalyp ótti.  

Dóńgelek ústeldiń maqsaty – Qazaqstan Respýblıkasynyń Ata zań baptaryndaǵy rýhanıat, adam quqyqtary men bostandyqtarynyń kepili, qazaqstandyq patrıotızmdi odan ári nyǵaıtý máseleleri boıynsha oı pikirlerdi ortaǵa salý.

1993 jyly 28 qańtarda Qazaqstan Joǵarǵy Keńesi táýelsiz egemendi memlekettiń birinshi Konstıtýsıasyn qabyldady. Iaǵnı, halyqqa qyzmet etýge shaqyrylǵan jańa memlekettik organdardyń qurylýy, táýelsiz eldiń azamattarynyń quqyqtary men bostandyqtary, egemendi Qazaqstan memleketin nyǵaıtý máselelerine úlken mán berildi. Alaıda 1993 jylǵy Qazaqstan Respýblıkasynyń Konstıtýsıasynda jańa memleketti damytý jolyndaǵy keıbir máseleler eskerilmegen edi. Nátıjesinde Qazaqstan Respýblıkasynyń búgingi tańdaǵy Konstıtýsıasy 30 tamyz 1995 jyly búkilhalyqtyq referendýmda qabyldandy. Bul kún memlekettik mereke – Qazaqstan Respýblıkasynyń Konstıtýsıa kúni bolyp sanalady. Memlekettiń negizgi zańynyń qabyldanýy Konstıtýsıa jobasynyń halyq arasynda keń kólemde talqyǵa túsýine alyp keldi. Talqylaýǵa 3 mln-nan astam azamat qatysyp, 33 myńǵa jýyq ujymdyq joba qarastyrylǵan.

Konstıtýsıaǵa qabyldanǵannan beri 1998, 2007, 2011 jáne 2017 jyldary 4 márte ózgertýler men tolyqtyrýlar engizildi.