Meniń oıymsha, búgingi kezeń qazaq úshin asa mańyzdy, asa taǵdyrly kezeń. Qazaq múddesin iske asyrý úshin qazaqtyń barsha ıntellektýal azamattary birigip jumys isteýi qajet. Meıli bir-birin jek kórsin, moıyndamasyn, biraq ult múddesi, qazaq múddesi úshin bir-birine tıispeı, muqatpaı, aıaqtan shalmaı shynaıy ultshyldyq, memleketshildik tanytýy paryz, mindet. 
Jalpy ıntellektýaldardyń júgi qashan da aýyr. Al bıliktegi ıntellekt ıeleriniń júgi - eki adamnyń biri kótere alatyn júk emes. Kóptegen dúnıeni, jaıdy eskere bilý qajet, kóptegen ıirimnen oı men ıdeıany shashqyzbaı alyp ótý kerek. Bul orasan zor salmaq. 
Marat Tájın aǵamyz jyldyń basynan beri kóptegen ıgi isti keshendi túrde bastap ketti. Latynǵa kóshý, 100 oqýlyq, ulttyq aýdarma isin jańǵyrtý, Qasıetti geografıa, Týǵan jer sıaqty baǵdarlamalar iske asýda. Aınalyp kelgende osynyń barlyǵy da qazaq múddesi úshin jasalyp jatyr. Bunyń bárin júrgizý tek búrokratıanyń syńyrjaq minezimen arpalysý, eskiliktiń ınersıasyna tótep berý arqyly júzege asyp jatyr. Aınalysyp júrgen sol Marat Tájın. 
Marat aǵamyzdy baıaǵy 1998 jyldardan beri bilemin. Qaramaǵynda, qol astynda qyzmet istegen kezim boldy. Kóp nárseni úırendim, túsindim Mákeńniń arqasynda. Barsha aıtqanymen, istegenimen kelise bermeýim múmkin. Biraq Mákeńdi eń aldymen memleketshil tulǵa, joǵary sapaly ıntellektýal retinde moıyndaımyn. O kisini orysshyl nemese basqa degenderdi tipti uǵyna almaımyn. 
Qazirgi kúni Mákeń Rýhanı jańǵyrý degen baǵdardyń kúndelikti qara jumysyn júrgizip jatyr. Kóptegen qarsylyq bar ekenin jurttyń bári kórip otyr. Sol qarsylyqtyń birinshi tolqynyn ǵana ótkerdik. Erteń búgingiden de dúleı, búgingiden de orasan qarsylyqqa tap bolamyz. Talaı aıtysýǵa týra keledi. Osyndaı kezde oı men parasat ıeleri bir-birin ashyq qoldamasa la, aıaǵynan shalmasa eken degen tilegim bar. 
Intellektýal adamdardyń barlyǵy derlik minshil, tákappar, kirpıaz keledi. Áıtpese ıntellektýal bolýy múmkin emes. Olaı bolsa sol ıntellektýaldardyń dostyǵy demeıin, eń bolmasa bir-birine ishteı syılastyǵy men qurmeti bolǵany abzal dep oılaımyn.