2 qazan kúni Qazaqstan terıtorıasynyń basym bóliginde atmosferalyq fronttardyń ótýine baılanysty keı jerlerde jaýyn-shashyndy aýa raıy saqtalady, eldiń tek shyǵys jáne ońtústik shyǵysynda jaýyn-shashynsyz kún raıy kútiledi. Keı jerlerde jel kúsheıip, tuman bolady,dep habarlaıdy Qamshy.kz aqparat agenttigi Qazgıdrometke silteme jasaı otyryp.

Atap aıtqanda, Aqmola, Qostanaı, Soltústik Qazaqstan,  Qaraǵandy, Shyǵys Qazaqstan oblystarynda túnde jáne tańerteń keı jerlerde tuman bolady. Aqmola, Qostanaı, Soltústik Qazaqstannyń keı aýmaqtarynda 15-20 m/s-qa deıin jeldiń kúsheıýi kútiledi.

Jambyl, Ońtústik Qazaqstan,  Qyzylorda, Mańǵystaý, Batys Qazaqstan,  Aqtóbe oblystarynyń jekelegen jerlerinde jel 15-20 m/s artady,  Jambyl oblysynda onyń ekpini 25 m/s jetedi.  Almaty oblysynda túnde jáne tańerteń keı jerlerde tuman bolady.

Almaty, Qaraǵandy oblystarynda 5 gradýsqa deıin úsik júrýi múmkin. Sondaı-aq Qyzylorda oblysynda, Aqtóbe men Atyraý oblystarynyń basym bóliginde, Ońtústik Qazaqstan, Jambyl, Batys Qazaqstan, Qostanaı, Qaraǵandy oblystarynyń keı jerlerinde joǵary órt qaýpi saqtalady.