Qazaqstan Respýblıkasynyń Aýyr atletıka federasıasy ulttyq quramanyń 2017 jylǵy Álem chempıonatynan shettetilýine qatysty málimdeme jasady, dep habarlaıdy Qamshy.kz aqparat agenttigi sports.kz-ke silteme jasaı otyryp.

«30 qyrkúıek - 1 qazan kúnderi Býharestte (Rýmynıa) Halyqaralyq aýyr atletıka federasıasy (IWF) Atqarýshy komıtetiniń kezekti otyrysy ótti. Otyrys barysynda IWF-tiń máseleleri, atap aıtqanda, salmaq kategorıalarynyń sany men Olımpıada oıyndarynyń kvalıfıkasıalyq erejelerin ózgertý jáne taǵy sol sıaqty máseleler talqylandy. Ásirese, otyrys kezinde talqyǵa túsken antıdopıngilik sharalar BAQ pen Halyqaralyq olımpıadalyq komıtettiń erekshe nazaryn aýdardy. Sebebi, bul suraqtar aýyr atletıkanyń bolashaǵyna tikeleı baılanysty. Beıjiń men Londondaǵy  Olımpıada oıyndaryna qatysýshylardyń synamalaryna «re-saraptama» kezinde dopıngtiń san márte anyqtalýyna baılanysty IWF qazir erekshe nazarda», - delingen QR AAF-tyń taratqan málimdemesinde.

Eske salsaq, 2016 jyldyń maýsymynda Tbılısı qalasynda IWF Atqarýshy komıtetiniń otyrysy ótken bolatyn. Onda Beıjiń jáne Londondaǵy Olımpıada oıyndary kezinde sportshylary antıdopıngtik zańnamany úsh jáne odan kóp ret buzǵan memleketterdi jarystan 1 jylǵa shettetý týraly sheshim qabyldandy. Atalǵan tizimge aýyr atletıka sportynda kóshbasshy sanalyp kelgen 9 memleket endi. Onyń ishinde Qazaqstan da bar.

«Kútilgendeı, Atqarýshy komıtettiń músheleri «Tbılısı sheshimin» qaıta qýattap, arnaıy komısıanyń keńesi negizinde onyń oryndalý joldaryn talqylady. Qazaqstandyq federasıa atalǵan máseleler talqylanǵan barlyq satyda birneshe sebepter boıynsha ózine sanksıalardyń engizilýin ádiletsiz ekendigin aıtqan bolatyn. Federasıanyń basqarýshy quramy tolyqtaı aýystyrylyp, antıdopıngilik saıasat jetildirilip, qatańdatyldy. Osynyń nátıjesinde, 2016 jáne 2017 jyldary qazaqstandyq atletterden tyıym salynǵan preparattar tabylǵan joq. Atalǵan aqparat qazaqstandyq delegasıa arqyly IWF Atqarýshy komıtetine joldandy», - dep habarlady Federasıadan.

Sondaı-aq, habarlamaǵa sáıkes, qazaqstandyq federasıa Atqarýshy komıtette osy jyldyń maýsym aıynan bastap IWF vıse-prezıdenti bolyp saılanǵan QR AAF prezıdenti Janat Túsipbekovpen tanystyrylǵan bolatyn.

«IWF-tiń resmı málimdemesine sáıkes, sheshimdi oryndaý jáne qajetti sharttar týraly aqparat osy jyldyń qazan aıynyń ortasynda 9 ulttyq federasıaǵa joldanatyn bolady. Qazaqstandyq tarap atalmysh tártiptik sharalardyń eshbiri Qazaqstannyń jasóspirimder jáne jastar quramasyna qoldanylmaýy, sonymen birge qazaqstandyq ókilder men federasıa tolyǵymen halyqaralyq jáne azıalyq federasıanyń basqarýshy organdarynda jumystaryn jalǵastyra berýi úshin kúsh salýda.

Kútilip otyrǵandaı, negizgi tártiptik shara - QR eresekter quramasynyń 12 aıǵa shettetilýi bolmaq. Arnaıy komısıanyń 9 eldiń dopıngke qarsy kúres salasyndaǵy ahýalyna júrgizetin monıtorıńisiniń qorytyndysy negizinde shettetý merzimi budan da erte aıaqtalýy múmkin», - delingen habarlamada.

Buǵan deıin habarlaǵanymyzdaı, Halyqaralyq aýyr atletıka federasıasy (IWF) Qazaqstan quramasyn aldaǵy ýaqytta AQSH-tyń Anahaıma qalasynda ótetin álem chempıonatyna qatysýdan shettetken bolatyn. Sondaı-aq Armenıa, Ázerbaıjan, Belarýs, Qytaı, Moldova, Túrkıa jáne Ýkraına memleketteriniń ulttyq quramalary bir jylǵa dıskvalıfıkasıalandy.