DAISH terorıstik toby turǵyndarǵa qatysty qandaı qatigez áreketterdi qoldanatyny belgisiz. Sırıada reportaj jasaý óte qaýipti. Sondyqtan jýrnalıser DAISH basyp alǵan jerlerge kóp bara bermeıdi. Alaıda óz ómirin qaterge tigip Sırıadaǵy jaǵdaı týraly aqparatty jýrnalıserge jetkizip otyrǵan turǵyndar bar. Bı-bı-sı korespondenti sońǵy úsh aıda Rakka turǵynymen habarlasyp turdy. Ol kúndelik jazady. Onda DAISH sodyrlary basyp alǵan qaladaǵy turǵyndardyń jaǵdaıy baıandalady.
Kýáger kúndeligi (2-shi bólim):
Ol meni aıaýsyz urdy. Onyń kózinen bul áreketin maqtan tutatynyn baıqadym.
Men úıge jetkende talyp qaldym. Júkti ápkem basymnan ótken jaǵdaıdy bilgennen keıin ýaıymdaǵany sonshalyq ózin nashar sezindi. Biz birden aýrýhanaǵa bardyq. Biraq aýrýhana jabyq eken. Kóshede ketip bara jatqan adam dáriger kórshisi ekenin jáne ony DAISH sodyrlary qamaýǵa alyp, aýrýhanasyn japqanyn aıtty. Olar er adamdardyń áıelderdi emdeýine tyıym salǵan. Biz áıel gınekologty izdedik. Biraq bizge úıge qaıtyp, demalý kerek ekenin aıtty.
Keıinirek men dosymdy kezdestirdim. Ol áldenege qobaljyp turǵandaı kórindi.
«Biz DAISH-qa qarsy jasyryn top qurdyq. Biz qanpezerlerdiń qalamyzda ne istep júrgenin búkil álemge jetkizgimiz keledi» dedi dosym.
Jolda taǵy Muhammed esimdi dosymdy kezdestirdim. Onyń óz dúkeni bar. Ol joldyń arǵy betindegi dúken ıesin nusqady. Onymen DAISH adamdary sóılesip turǵan edi. Bireýiniń qolynda bir býma qaǵaz boldy.
«Eı, mynaý dúkenniń ıesi kim?» dep aıqaılady biri. «Men» dep jaýap berdi Muhammed.
«Biz kahtanbyz. Salyq jınaýǵa keldik» dedi olar. Atalmysh uıym kedeılerge kómektesedi, alaıda bul adamdar DAISH-qa arnap salyq jınap júrgender.
— Men tóleý qajet salyqtyń barlyǵyn tólep qoıǵanmyn
— Jap aýzyńdy
— Sen bizge 100 myń sırıalyq fýnt tóleýiń kerek.
Bul óte úlken somma, biraq Muhammed tóledi. Sebebi DAISH-tyń jolyn keskenderdiń bastaryn shaýyp alyp otyrǵan.
Túnde úıimiz jarylystan qozǵalyp ketti. Jańalyqtardan halyqaralyq koalısıa alǵash ret DAISH-qa qarsy soqqy jasaǵanyn estidik.
Kelesi kúni taksı júrgizýshisi bombanyń DAISH-qa tıesili kóptegen ǵımaratqa túskenin aıtty. Polısıa DAISH týraly aqparatty jetkizgenderdi izdep jatqanyn eskertti.
Kóshede bir top adam shuńqyrdyń janyna jınaldy. Shuńqyrda áıel otyrdy. Er adamdardyń biri «Bul áıel zına jasady. Sondyqtan taspen óltiriledi» dedi ol. Onyń sózderin ushyp bara jatqan ushaq basyp tastady. Satýshylardyń biri «Tyǵylyńdar, tyǵylyńdar» dep aıqaılady. Bazarǵa bomba tastaldy. Kóshede bólshektengen adamdardyń denesi jatty. Kóbine beıbit turǵyndar zardap shekti. Bul terrorısterdiń kózin joıýǵa arnalǵan reseılik ushaq edi. Qaladaǵa terorızmnen qıyndyq kórip otyrǵanymyz az ba edi?! Endi bizde áýeden de soqqy jasaıyn dedi me?
