Búgin Mońǵolıanyń premer-mınıstri Ýhnaagıın Hýrelsýh búrkitshi qazaq qyzy Aısholpan Nurǵaıypty qabyldady, dep habarlaıdy Qamshy.kz aqparat agenttigi.
Premer-mınıstr ata dástúr arqyly Mońǵolıany álemge nasıhattaǵan Aısholpanǵa qoldaý bildirip, alǵys aıtty.
On jasynan qyran baptaǵan qazaq qyzy týraly "Búrkitshi" fılmi túsirilgen. Atalmysh fılm 2 qarasha kúni Nú-Iorkte ótken kınofestıvalde "Azıa qurlyǵyn ózgertetin azamat” atty syılyqqa ıe bolǵan edi.
Budan buryn ánshi Sia Mońǵolıadan búrkitshi qazaq qyzy Aısholpan Nurǵaıyp týraly fılmge sýndtrek bolyp tabylatyn «Angel by the Wings» atty jańa ánin jazǵany habarlanǵan.
Fılm ata-baba dástúrin jalǵastyrǵan búrkitshilik ónerdi meńgergen qazaq qyzy Aısholpan Nurǵaıyp jaıly. Bul negizinen erlerge tán kásip. Álemde bul ónermen tek 2 názik jandy ǵana shuǵyldanady eken. Olardyń ekeýi de - qazaq. Ekinshisi Qazaqstanda turatyn búrkitshi Maqpal Ábdirazaqova.
Aısholpandy uıań, názik ári batyr qyz degen North West Herald amerıkalyq basylymy «Bul fılm kórermendi Aısholpannyń álemine aparady. Aısholpan óskende dáriger bolýdy armandaıdy. Biraq búrkitshilikti tastaǵysy kelmeıdi. «Búrkitshi qyz» – jastarǵa shabyt beretin, áserli peızajymen júrekterge jylý beretin fılm» dep jazǵan.
Qabyldaý barysynda búrkitshi qyz Harvard, London ýnıversıtetterinen shaqyrý alǵandyqtan, bolashaqta dáriger bolǵysy keletinin úkimet basshysyna bildirdi.
